Mar ang makabentaha

Tan-aw nako, kon mahinayon nga ma-disqualify gyud si Senador Grace Poe nga kandidato pagka presidente sa nasud, sigurado nga malipay ang kampo ni kanhi DILG Secretary Mar Roxas.

Bisan og may kahigayonan pa nga si Poe makaapelar sa hukom sa Commission on Elections, apan klaro na kaayo nga ang pag-estar niya dinhi sa nasud wala pa makaabot sa gilatid nga napulo ka tuig.

Ang nindot karon mao nga mentras wala pa moabot ang Desiyembre 10, magbaylo sila si Senador Chiz Escudero nga maoy iyang ka-tandem pagka bise presidente.

Si Chiz mas haum nga mag-presidente kay kang Poe apan gilupig lang sa popularity rating. Kun si Chiz ang mag-presidente, unya bise lang si Grace Poe, mas bentaha pa.

Miingon ko nga makabentaha si Mar Roxas niining labing ulahi nga kalamboan kay si Poe maoy kanunay nga nag-una sa survey.

Para nako, dili kaayo problema ni Mar sila si Davao City Mayor Rodrigo Duterte kay daghan na ang nasuko kaniya karon tungod sa pagbugal-bugal niya ni Pope Francis.

Labaw na nga dili kaayo problema ni Mar si Vice President Binay tungod kay daghang tawo ang wala na ganahi kaniya tungod sa pasangil sa kurapsyon. Aw, hinuon, dili usab kakumpiyansaan si Binay kay lig-on ang iyang partido.

***

Dinhi sa dakbayan sa Sugbo, makita nimo nga bisan sayo sa buntag, manggimok na ang mga kandidato sa duha ka grupo nga manuroy sa kabarangayan ug manglamano sa mga tawo.

Ingon niana gyud ang tukma nilang buhaton. Kampanya lang gyud ug likayan ang pagdinaotay sa kadungganan. Pasabton ra ninyo ang katawhan kun ngano nga kamo man maoy angay'ng botohan sa eleksyon.

Apan didto sa Mandaue, dunay ubang mga tawo nga bisan ang tawo nabiktima sa katalagman, ingon sa inudnod pa gyud hinoon nila.

Ang gipasabot nako nga ang pamilya ni Konsehal Lolypop Ouano-Dizon gipasanginlan nga mituyo pagsunog sa ilang opisina ug bodega didto sa Barangay Opao sayo ning semanaha aron kuno makakobra sa insurance.

Bati kini nga matang sa propaganda kay kinsa man gud ang motuyo pagsunog unya maninguha nga pamawong ang kayo? Gihulagmay man gud si Lolypop nga kusog kay sa iyang kontra mao nga adunay gusto nga modaot kaniya.

***

Daghan man diay nga taga Mandaue ang gusto gyud nga si Mayor Jonas Cortes molansar lang pagka bise mayor, nungka nga siya mag-kongresista. Wala gyud lagi ko masayop sa akong baruganan.

Ang mga higala nako sa Mandaue nagtuo gyud nga "sure winner" si Jonas kun ang pagka bise mayor maoy iyang daganan. Tan-awa, tukma gyud ang akong giingon nga mas haum si Jonas nga mag-bise mayor.

Kinsa man gud ang makalupig ni Jonas kun bise mayor ang iyang daganan. Pinaagi niini, dili pa masayod nga ikyasan niya ang problema sa trapiko nga wala niya masulbad karon ubos sa iyang administrasyon.

Kun sila si Lolypop ug Jonas ang modaog pagka mayor ug bise mayor dili man imposible nga magkasabot ra sila pagpalambo sa Mandaue kay dili man gyud sila kontra.

Daghang taga Mandaue ang ganahan gyud nga si Atty. Carlo Fortuna nga karon maoy midagan pagka bise mayor, maoy molansar pagka kongresista sa siksto distrito.

Tingali, kun si Carlo na ang kandidato pagka kongresista, modawat na kini sa hagit ni Dr. Paulus Cañete, laing kandidato pagka kongresista, nga sila magdebate.

Matan-aw nako nga patas na 'sab unya nga sila si Cañete ug Carlo magdebate kay pulos man sila maayo sa debate. Dili pagdaot ni Jonas, dili gyud siya magsilbi ni Cañete kon magdebate.

Ako pa ni Jonas, dili niya talikdan ang Mandaue kay aron dili mahiubos kaniya ang mga tawo. Unya, usbon usab ni Jonas ang iyang batasan nga lihay kaayo sa media kon interviewhon.