Maapsan pa ba si Poe?

Nahuman na bang piniliay? May sukaranan ang mga dumadapig ni Senador Grace Poe nga magsaulog na human niburot ang iyang labaw sa ubang mga magpapili pagka presidente. Unom ka buwan sa di pang piniliay sa Mayo 9, 2016, seguro na ba gyud ang iyang kadaogan?

Gihimo sa Pulse Asia ang survey sud sa 12 ka adlaw, niadtong Oktubre 18-29, atol sa pagsulbong pag-ayo sa hilanat sa mga politiko nga nisumiter sa ilang certificates of candidacy sa mga buhatan sa Commission on Elections. Kanus-a naklaro na kinsa’y managan sa duha ka labing taas nga katungdanan sa nasud. Gawas lang sa nagpalugit pag-ayong si Davao City Mayor Rodrigo Duterte.

***

Tungod tingali kay ilang ngan ang gisumsoman sa tanang suok sa nasud, pulos nisaka ang rating sa nag-unang mga magpapili pagka presidente. Ang labing taas og layat mao si Poe, kinsa nakaangkon og 39 porsiyento, labaw og 13 puntos sa iyang rating nga 26 porsiyento niadtong Septiyembre.

Ikaduhang dako og layat si Senador Miriam Defensor Santiago, 11 porsiyento gikan sa 3 porsiyento. Makaginhawa og luag si Bise Presidente Jejomar Binay kay nisaka og 5 puntos ang iyang rating gikan sa 19 porsiyento ngadto sa 24 porsiyento. Bugtong nalansang mao si kanhi Interior Secretary Mar Roxas nga nisaka lang og usa gikan sa 20 porsiyento niadtong Septiyembre ngadto sa 21 porsiyento sa Oktubre.

***

Angayng mabalaka silang Binay ug Roxas sa nagkadako nga labaw ni Poe nila. Ang labaw ni Poe kang Binay nga 7 puntos niadtong Septiyembre niburot ngadto sa 15 puntos sa labing uwahing survey. Mas dakong kabalaka ni Roxas, ang 6 puntos nga labaw ni Poe niadtong Septiyembre nahimo nang 18 puntos sa Oktubre.

Gipasaligan hinuon silang Binay ug Roxas sa ilang mga dumadapig nga magsige gyud og usab-usab ang ratings pinasikad sa mga gihimo ug gipanulti sa mga piliunon ug sa mga panghitabo atol sa pagpahigayon sa surveys. Nitataw sila nga magsugod sa uno ang tanan ini’g pormal na og sugod sa campaign period sa Pebrero sunod tuig.

***

Pulos sab nisaka ang ratings sa mga magpapili pagka bise presidente. Apan ang labing dako og layat mao si Senador Chiz Escudero, runningmate ni Poe. Duna na siya karoy 43 porsiyento, labaw og 20 sa iyang 23 porsiyento niadtong Septiyembre.

Nisaka sang rating ni Senador Bongbong Marcos og 8 puntos gikan sa 13 porsiyento ngadto na sa 21 porsiyento. Managsamang 2 puntos ang saka sa rating nilang Senador Alan Peter Cayetano (11 porsiyento gikan sa 9 porsiyento) ug Senador Antonio Trillanes IV (6 porsiento gikan sa 4 porsiyento). Mas dakong saka sa rating ni Kongresista Leni Robredo, 3 porsiyento sa Septiyembre ngadto sa 7 porsiyento sa Oktubre.

[email protected]