Maniobra ni Jonas

Dili makalikay si Mandaue City Mayor Jonas Cortes sa pagduda nga siya maoy nagmaniobra aron masirad-an ang DYPC-FM, ang radio station nga nagbase diha sa Barangay Canduman, nga iya ni Dr. Paulus Cañete.

Ang kadagkoan sa National Telecommunications Commission (NTC) mitug-an nga adunay mireklamo didto sa ilang central office kabahin sa DYPC-FM.

Dili nato mabasol kadtong mga nagduda nga si Jonas maoy nagmaniobra nga masirad-an ang DYPC-FM kay sila man si Paulus maoy kaatbang sa pagdagan isip kongresista diha sa ikaunom nga distrito.

Ang pangatarongan ni Paulus nga ang iyang radio station gigamit kini nga “training ground” sa mga tinun-an sa Mass Communications. Matud sa NTC nga ang gireklamo mao nga aduna may mga kumentaryo.

Pastilan pud kini si Jonas, ang hinay kaayo nga radio station iya pa gyud nga daginoton. Gigamit man kana nga radio station sa mga tinun-an sa Mass Com, ayaw na kana daginota pa.

Tan-aw nako, naingon niini si Jonas kay ang pagdagan ni Paulus sa pagka kongresista nakahatag man gyud niya’g problema. Adunay mga lugar sa ikaunom nga distrito nga mas ilado si Paulus.

Ang nindot gyud lagi aning Jonas mao nga pagka bise mayor maoy iyang daganan ug magbaylo sila si Carlo Fortuna nga mao na ang molansar pagka kongresista.

Maisip nga “sure winner” si Jonas kon bise mayor ang iyang daganan kay sigurado nga malupig niya ang iyang ikakontra. Apan kun pagka kongresista, walay siguro nga siya modaog.

* * *

Wala ko makabantay nga may gipahigayon diay unta nga debate dinhi sa Sugbo tali sa mga mikandidato pagka presidente? Matud pa nga ang tigpasiugda miimbitar sa upat, apan si Mar Roxas ra ang mitunga.

Ang mga wala mitunga mao sila si Vice President Jejomar Binay, Senador Miriam Defensor-Santiago ug Senador Grace Poe. Maisip hinuon nga ang tulo nahadlok sa debate.

Matud ni Konsehal Richie Osmeña, ang secretary general sa United Nationalist Alliance dinhi sa Sugbo, nga nagpaabot sila nga ang umaabot nga presidential elections maoy “rematch” nila ni Binay ug Roxas.

Nagtuo sila nga si Poe madeklarar gayud nga American Citizen ug dili na katugotan nga makapadayon paglansar pagka presidente. Aw, kun mahitabo kini, maingon nato nga alegre gyud ang eleksyon.

Kumbati kini sa duha ka kandidato, ang usa nabulit sa pasangil sa kurapsyon samtang ang usa walay dautang rekord sa pangawkaw. Mura’g klaro na kon kinsa ang pilion sa katawhan.

Apan dunay angay’ng usbon ni Mar Roxas sa pagsuroy-suroy niya sa lainlaing dapit sa nasud. Kinahanglan nga dili siya maglikay-likay sa mga sakop sa media nga gusto nga mo-interview kaniya.

* * *

Pagka bise presidente, tan-aw nako mura’g ang higpit nga magkaatbang mao sila si Leni Robredo sa Liberal ug si Senador Chiz Escudero ang ka-tandem ni Grace Poe.

Kay sila si Senador Gringo Honasan (bise ni Binay), Senador Bongbong Marcos (bise ni Miriam) ug si Senador Allan Peter Cayetano, dili kaayo sikat sa mga botante.

Si Marcos ilado sa iyang apelyido, apan ambot og nakalimot na ba kaha ang mga tawo sa “unexplained wealth” sa mga Marcos kaniadto.

Si Chiz mas suheto sa pagpadagan sa kagamhanan, dili pagdaot mas makamao pa gani si Chiz kay kang Poe. Si Leni, gihulagway usab nga buotang opisyal sa kagamhanan.

Mao kini ang basehanan nga tan-aw nako, sa pagka bise presidente, ang bugno anaa ra kanila ni Chiz ug ni Leni.

  * * *

Sa dakbayan sa Sugbo, bisan og wala pay kampanya, bisi na kaayo ang mga kandidato sa pagsuroy sa lainlaing mga barangay ug paglamano sa mga botante. 

Kaniadtong miaging Sabado sa gabii, didto ko sa Barangay Paril, sakop sa dakbayan sa Sugbo, gikakita nako ang mga kandidato sa Bando Osmeña Pundok-Kauswagan nga gipangulohan ni kanhi Mayor Tomas Osmeña.

Naninguha gyud ang BOPK nga pildehon nila ang ilang mga kaatbang nga kandidato sa Team Rama. Aw, sa mga konsehal hinuon diri sa north district, daghang sakop sa BOPK ang dumadaog.