Sipyat ni PNoy

Dakong sayop ni Presidente Aquino nga dugay kaayo niya nga gitagad ang isyu kabahin sa gitawag og "Tanim Bala" o "Laglag Bala" sa mga kargamento nga moagi diha sa Ninoy Aquino International Airport.

Tan-awa, gigamit kini karon nga isyu sa mga kaatbang nila sa politika nga nangandoy'ng maapektahan niini ang kandidatura ni kanhi DILG Secretary Mar Roxas, ang kandidato ni PNoy pagka presidente.

Duna ko'y pagduda nga pipila ka kawani sa airport mihimo gyud niini aron sila makapangwarta mao nga angay unta kadto nga mimando dayon si PNoy nga imbestigahon kini sa National Bureau of Investigation.

Sa balita, si Mar Roxas miawhag sa katawhan nga magmabinantayon gyud diha sa airport ug kon may nahibaw-an sila niini, angay nga mopahibalo dayon sila sa mga tinugyanan sa balaod.

Bitaw, kon ako ang kawani sa airport nga wala magbuhat niining nakontrobersyal nga "Tanim Bala" itug-an nako ang binuang sa akong mga kauban kay ang dungog sa tibuok airport ang ilang gidaot.

***

Gisaway pag-ayo sa katawhan si Senador Grace Poe-Llamanzares sa pag-ingon niya nga ang iyang bana mahimong mobiya na sa iyang US Citizenship kon modaog siya pagka presidente.

Nagpaila ra gyud kini nga wala sila'y gugma sa Pilipinas. Dili maayo nga linglahon ra ni Grace Poe ang mga botante. Usa kini sa wala nako magustohi ni Poe kay makausa gisalikway niya ang iyang pagka Filipino.

Gidawat siya pagka US Citizen kaniadto kay nanumpa man si Grace Poe nga kon adunay kagubot nga maglambigit sa United States, andam niya kini nga pakamatyan.

Mao kana ang imong isulti ug panumpaan kana niadtong mga tawo nga gusto mahimong US Citizen. Unya karon si Grace Poe gusto na nga mangalagad isip presidente sa nasud nga makausa iyang giitsa-puwera?

Sa laing bahin, daghan pa gihapon karon ang wala kawad-i sa paglaom nga modayon paglansar pagka presidente si Davao City Mayor Rodrigo Duterte.

Ang ilang paglaom gibase tungod kay sa balaod mahimo pa nga ang usa ka partido makahulip ug kandidato hangtod sa Desiyembre 10. Apan unsaon nga si Duterte miingon na man nga dili siya pang-substitute?

Matud ni Duterte nga nakahatag na siya sa iyang hukom nga dili modagan pagka presidente ug mao kini ang iyang barugan kay dili siya mag-usab-usab og baruganan.

Mao kana nga kamong mga botante, huna-hunaa ninyo pag-ayo kon kinsa ang maayong palingkuron diha sa Malacañang. Ang tawo ba nga nabulit sa isyu sa pangurakot, o ang tawo nga walay buling ang dungog?

***

Dunay mga taga Cordova nga nangalipay kay gi-feature na usab sa Banat News, igsuong mantalaan sa The Freeman, ang produkto nila nga Bakasi. Mosamot kuno kadaghan ang ilang kustomers.

Gipahimuslan na lang nako pagpangutana ang mga nanawag kabahin sa politika. Sa pagka kongresista kuno sa 6th district dili sila ganahan ni Mayor Jonas Cortes kay gitandi man nila kini kang Dr. Paulus Cañete.

Pagka karon gud, sila ra man si Jonas ug si Paulus ang nagpapili pagka kongresista diha sa ikaunom nga distrito.

Ang nindot gyud lagi mao nga si Atty. Carlo Fortuna mosibog sa iyang tinguha nga magbise mayor ubos sa Liberal Party ug siya ang modagan pagka kongresista.

Mahulog nga magbaylo sila si Carlo ug Jonas nga mao na ang molansar pagka bise mayor. Abi ninyo og ngano? Abogado si Jonas ug siya ang haum nga mahimong kongresista kay hanas sa pakiglantugi didto sa Kongreso.

Kay matud sa mga tinubdan kusog man kaayo si Konsehal Lolypop Ouano-Dizon sa pagka mayor ubos sa One Cebu, mahimo nga si Jonas maoy magsilbe nga fiscalizer sa administrasyon ni Lolypop.

Tan-aw nako, nindot kaayo kini kay si Jonas makapadayon pa sa pagserbisyo sa Mandaue. Dili kay biyaan na lang niya ang grabeng problema sa trapiko nga wala niya masulbad karon kay gusto na siya nga magkongresista.