14th month pay gisugyot

Nindot kaayo kon maaprobahan ang balaudnon ni Cebu City South District Congressman Rodrigo Abellanosa nga himoon na nga mandatory ang paghatag og 14th Month Pay sa mga empleyado sa kagamhanan ug pribadong sektor.

Ang 14th Month Pay susama gihapon kini sa 13th Month Pay nga ang kantidad katumbas sa usa ka buwan nga sweldo. Sigurado g'yud hinoon ni nga makasugat og problema kay daghang mga magbabalaod ang mga employers 'sab.

Nindot unta kun maaprobahan na kini, kadtong mga kompaniya nga naghatag na og 14th Month Pay, modugang lang gihapon og bali'g usa ka buwan nga sweldohan.

* * *

Dinhi sa Sugbo kagahapon si Kongresista Leni Robredo, ang katandem ni Mar Roxas sa paglansar pagka presidente. Dili hambugero kini si Robredo kay tiaw mo, kongresista apan mosakay lang gihapon og bus.

Pagkakita nako sa hulagway ni Robredo uban sa iyang mga anak nga nagyaka sa sawog sa terminal didto sa Luzon kay nagpaabot sa ilang masakyan, wala ko makapugong sa pagkumentaryo nga dili kini tinuod.

Kinsa man gud ang motuo nga kongresista mosakay og bus unya magyaka sa sawog sa terminal? May sakyanan man unta ang mga kongresista mao nga wala ko motuo nga mag-bus si Robredo.

Apan gitug-anan ko sa akong kauban nga editor sa Banat News nga si Edwin Melecio nga tinuod kini. Kun mao na, angay'ng daygon si Robredo kay ang uban gani bisan og konsehal lang dili na man hapit molakaw, dili na 'sab mosakay'g jeep.

Timan-i nga abogado si Robredo ug kongresista. Makaingon ko nga wala masayop ang Partido Liberal pagkuha kang Robredo nga kandidato pagka bise presidente. Ang iyang katandem nga si Mar, mapaubsanon man 'sab.

May sipyat lang hinuon si Roxas kay kun mobisita siya og usa ka lugar dili kaayo siya mohatag og higayon sa media nga gustong mo-interview kaniya. Ngano nga mahadlok man si Roxas nga wala man siya'y anomaliya.

* * *

Atong gidiskuter ang politika sa Mandaue City sa lindog nato kaniadtong Martes. Daghan ang nakagusto sa akong sugyot nga mas bentaha kun si Mayor Jonas Cortes modagan lang sa pagka bise mayor ug dili pagka kongresista sa 6th district.

Kunpirmado ang taga Mandaue City nga sure winner si Jonas kun bise mayor ang iyang daganan. Wala g'yud ko masayop sa akong panglantaw kay gisuportahan kini sa mga taga Mandaue nga mihatag kanako sa ilang reaksyon.

Apan mas nindot g'yud kun si Atty. Carlo Fortuna nga usa ka abogado maoy modagan pagka kongresista sa Liberal Party sa 6th district kay didto sa Kongreso mas haum siya kay ni Jonas.

Dili man kalikayan nga aduna g'yuy debate didto sa Kongreso ug si Atty. Fortuna takus kaayo kay usa man siya ka abogado. Unya, kay sure winner man g'yud si Jonas kon mag-bise mayor, siya maoy fiscalizer sa Mandaue.

Kun modaog usab si Konsehal Lolypop Ouano-Dizon pagka mayor, dili imposible nga magkauli ra ang ilang maayong kabubut-on ni Jonas kay daan man sila nga kauban sa grupo.

May panahon pa sila kay ang mga politikanhong partido makahimo pa man pag-substitute sa ilang mga kandidato hangtud sa Desiyembre 10. Kon mahitabo kini, ang magtandem pagka mayor ug bise mayor ubos sa One Cebu mao na sila si Lolypop ug Konsehal Beethoven Andaya.

Unya sa LP, ang magtandem mao sila si Luigi Quisumbing ug si Jonas. Pagka Kongresista sa 6th district, ang magtigi mao na sila si Atty. Fortuna ug si Dr. Paulus Cañete. Dili ba maayo?