Kauhaw bisan sa baha

Niangkon ang Metro Cebu Water District  nga may mga dapit na sa Metro Cebu nga mapawongan og suplay sa tubig sud sa pila ka oras matag adlaw tungod sa El Niño. Gitumbok sa MCWD ang pagtidlom sa suplay sa tubig sa ilawom sa yuta tungod sa huwaw nga nagsugod niadtong Marso ug gitakdang mas mobangis pa sugod karong buwana.

Lisod hinuon nga kumbinsihon ang katawhan sa mas grabeng El Niño tungod sa pat-ak pat-ak nga pagbundak sa uwan matag karon ug unya. Hinaot nga ang pagbaha sa pipila ka bahin sa Sugbo di makalipat sa katawhan sa kadinalian sa panginahanglan sa pagdaginot sa tubig.

* * *

Nikumpisal si Charmaine Rodrgiuez Kara, tigpamaba sa MCWD, nga bisan sa ilang paningkamot pagpangita og alternatibong mga tinubdan sa tubig di gyod katapakan ang mas dakong pagtidlom sa tubig sa ilawom sa yuta. Giawhag niya ang mga konsumidor sa pagpundo og tubig aron nga may magamit pa bisan wa nay agas ang ilang mga gripo.

Dako ang kalainan sa kaandam sa bag-ong liderato sa MCWD pagpahibawo sa tinuorayng kahimtang sa suplay sa tubig. Kon itandi sa pag-insistir sa kanhi general manager nga si Ernie Delco nga may igo pang suplay sa tubig aron lang nga di maila ang iyang pamunoan nga napakyas sa pagbaraw sa kanihit.

* * *

Kay MCWD man ang labing suhito sa ilang sistema, hinaot nga tabangan nilang mga konsumidor nga mahimong mas andam sa pagkapawong sa tubig. Kon di man gyod kapugngan ang pagkaputol sa suplay, hinaot nga wagtangon na lang nilang kalibog sa mga konsumidor.

Pinaagi sa paghatag sa schedule sa agas ug pawong sa tubig sa unsang oras sa adlaw ug gabii sa unsang kabalayan sa unsang kabaranggayan. Kon di man gyod matakda sa ilang sistema ang oras sa agas ug pawong, mahimong ipahibawo lang sa MCWD ang aktuwal nga kahimtang ug kapasidad sa unsa nga mga bomba nga nagsuplay sa unsa nga mga dapit sa Metro Cebu.

* * *

May umaabot na sang bagyo nga mahimong mosud sa Philippine Area of Responsibility  karong Miyerkules o Huwebes. Bisan di direktang moigo sa bisan asang bahin sa Pilipinas, gipaabot ang bagyong "Jenny" nga makapasamot sa Habagat ug mohatod og dugang uwan sa Sugbo ug Kabisay-an.

Apan ang mga uwan nga mokalit og bundak ug mokalit sab og hunong di makatabang pagpuno sa inanay nang nihubas nga groundwater sa Sugbo. Daghang salamat sa kaupaw sa atong kabukiran ug sa kabakilid sa kinadak-ang bahin sa atong isla, ang uwan nga mopadahili sa kabukiran, mopasuyla sa mga suba ug mobaha sa kabalayan sa patag modiretso ra pag-awas ngadto sa dagat sa di pa makatuhop paingon sa ilawom sa yuta.

[email protected]