Lalis sa presyo sa lana

Mahimong mosaka na sab ang presyo sa mga produkto sa lana sa ikatulong sunudsunod nga semana karong semanaha. Mahimo sang mous-os. Naglalis ang mga eksperto sa lana sa tinuorayng kahimtang sa kalibotanong merkado sa lana. May nipasidaan nga padayong motidlom ang lana hangtod sa kataposan ning tuiga ug mahimo ganing di makabawi hangtod sa sunod tuig.

Apan may niinsistir sab nga ang pagtidlom sa produksiyon sa lana sa Estados Unidos inanay nang makapapas sa gibanabana nga usa ka bilyon ka baril nga sobrang suplay sa lana sa kalibotanong merkado. Ug busa nangagpas sila nga inanay na sang mosaka ang presyo sa lana gikan sa dako ug kalit nga pagtidlom sa niaging 12 na ka buwan.

***

Ang orihinal nga pangagpas sa mga eksperto mao nga magsige og tibugsok ang presyo sa lana hangtod sa kataposan sa dekada, o sa 2020, kanus-a gituohan nila nga mamahimo nang P15 ang litro sa mga produkto sa lana. Duha ang gipasikaran sa ilang panglantaw:

•Gideklarar nila nga nabungkag nang cartel sa Organization of Petroleum Exporting Countries ug di na makadiktar sa suplay ug presyo sa lana sa merkado sa kalibotan; ug

•Ang gipaabot nga padayong pagtidlom sa kalibotanong demanda sa lana tungod sa pagluya sa ekonomiya sa China, Japan ug sa pipila ka kanasuran sa Uropa.

***

Nasaksihan hinuon sa mga konsumidor sa Pilipinas ug ubang kanasuran ang pagsaka sa presyo sa mga produkto sa lana sa niaging duha na ka semana. Nipasidaan ang ubang mga eksperto nga magpadayon ni sa mosunod nga mga semana tungod sa:

•Paglaslas o paghunong gyod sa produksiyon sa pipila ka shale oil companies sa Estados Unidos ug ubang kanasuran nga di sakop sa OPEC kay maalkanse na sila kon padayong motidlom sa presyo; ug

•Human napanalipdan sa OPEC ang ilang bahin sa merkado, kay mas barato mang ilang lana gikan sa ilawom sa yuta kay sa lana gikan sa bato sa karibal nga mga nasud, mahimong laslasan sang ilang produksiyon aron padayong mosaka ang presyo.

***

May nahibilin pang mga alas ang mga nakumbinser nga padayong motidlom ang presyo: Nitidlom ang kalibotanong halin sa mga sakyanan, nga nagkahulogan og mas ubos nga konsumo sa lana; ug padayong naluya ang ekonomiya sa China, ang ikaduhang labing dakong konsumidor sa lana sa tibuok kalibotan.

Maong atong atangan unsay mahitabo sa presyo sa lana karong semanaha. Kasagaran sa lokal nga mga kompaniya mousab sa ilang presyo sa Martes sa kadlawon. Apan kay deregulated na mang industriya, mahimo silang mousab sa presyo karong gabii. O bisan kanus-a. Bugtong bentaha sa mga konsumidor mao nga nahibawo na sila sa dagan sa kalibotanong merkado ug di na mahimong isud sa bolsa.

[email protected]