Nabawo nga protesta
Pipila ka gutlo sa wa pa ipahibawo sa Iglesia ni Cristo ang paghunong sa tanan nilang protesta--ang upat na ka adlaw nga protesta sa kaulohan ug ang mao pa untay pagsugod nga mga protesta sa Sugbo ug sa Davao--gipahibawo mi sa mga sakop sa INC sa Sugbo nga wa sila moawhag nga palagputon si Justice Secretary Leila de Lima sa katungdanan.
Busa dihang nangangkon ang tigpamaba sa INC nga si Bienvenido Santiago, usa sa mga sinumbong sa kasong illegal nga detention nga nag-ung-ong karon sa Department of Justice, nga gihatag sa ilang gobyerno ang ilang hangyo, nitumaw ang kalibog unsa ang nasabotan sa mga opisyal sa gobyerno ug sa INC.
***
Sa usa ka bahin, makauuwaw sa bahin sa INC ang kalit nga paghunong sa ilang protesta. Nabawo intawon ang ilang mga sakop sa kasilinganang mga lalawigan pagbiyahe sa Sugbo ug Davao aron lang pabalikon sa ilang gigikanan.
Nadutlan na ba ang kadagkoan sa INC sa sibaw nga reklamo sa mga motorista ug mga pasahero nga natanggong sa ilang pagbabag sa trapiko sa EDSA ug sa mas sibaw nga mga pagsaway sa ubang bahin sa nasud ug sa kalibotan sa ka way klaro sa ilang demanda? Nagpasabot bang ilang demanda nga buwagon ang simbahan ug estado nga di na sila mopadaylang sa ilang pagsuporta og mga managan sa mga piniliay?
***
Sa pikas nga bahin, sakto ang paglugway sa gobyerno sa tanang pailob alang sa protesta sa INC. Bisan nakahasol sa trapiko ug bisan lahap nang sinultihan sa pipila sa mga nidiskurso gipatigbabaw ang katungod sa mga sakop sa INC sa pagprotesta.
Kon gigamitan pa og puwersa ang paghipos ug pagpahilom sa mga demonstrador, mas dako unta ang kaguliyang nga mamugna. Karon ang kadagkoan sa INC maoy may dakong tulubagon sa pipila ka sakop sa media nga gikulata sa emosyonal nilang mga sakop ug sa mas daghan nga nahasi sa ilang pagbabag sa kadalanan.
***
Apan ang kanihit og detalye sa mga pamahayag sa mga opisyal sa gobyerno ug sa INC sa nakab-ot nilang kasabotan mahimong makapalugway ug mas makapadako pa sa kontrobersiya. May sukaranan ang kihante nga si Isaias Samson Jr., kanhi ministro sa INC, nga maoy labing mokisikisi. Ibasura ba sa DOJ ang iyang kaso bugti sa dinaliang paghunong sa mga protesta?
Hingpit hinuon nga gipanalipdan sa Malakanyang si Justice Secretary Leila de Lima ug wa magtihik-tihik sa pagpasidaan sa INC sa di pagyatak sa katungod sa mas daghan. Bisan o tungod ba kaha sa pagsuporta sa mga kaatbang sa administrasyon, ang protesta sa INC napakyas pagkuha sa simpatiya sa kinabag-an. Mahimong ang dinalidaling paghipos sa protesta mao na lay nahibiling kapilian pagluwas sa ilang dagway.
- Latest
