Pagkabayo sa INC
Kaila nako nga mga sakop sa Iglesia ni Cristo sa Sugbo niingon nga moapil sila og protesta batok ni Justice Secretary Leila de Lima kay gipadakop ang ilang kadagkoan nga gipasanginlang nitanggong sa pipila ka opisyal nga nikuwestiyon sa giingong pangurakot sa bag-o nilang liderato.
Hinaot nga di sila modiretso og tuo sa kasayuran nga gilawog sa ilang kadagkoan kay:
Wa pay warrant of arrest nga giluwatan batok sa mga ministro nga sakop sa Sanggunian sa INC;
Dili si De Lima, kon dili, ang korte ra maoy makaluwat og warrant of arrest batok sa ministro nga gipasanginlan og ilegal detention; ug
Di pa maisyu ang bisan unsang warrant of arrest batok sa mga opisyal sa INC kay wa pay bisan usa ka kaso nga napasaka batok nila sa korte.
* * *
Tungod sa kadaghan na sa mga politiko nga nikabayo ug sa kadaghan na sa ubang mga istorya nga gipakatap, nameligro nga matabonan ang tinuod nga hinungdan sa protesta nga gilusad sa INC sa buhatan ni De Lima sa DOJ, nga nibalhin sa EDSA ug gitakdang ipahigayon 'sab sa Sugbo, Davao ug Palawan:
Nasuko ang kadagkoan sa INC ngano nga gipa-imbestigar ni De Lima ang kasong illegal detention nga gipasaka ni Isaias Samson Jr., ang gipalagpot nga ministro sa INC, batok nilang Glicerio Santos Jr., Radel Cortez, Bienvenido Santiago Sr.; Mathusalem Pareja; Rolando Esguerra; Erano Codera; Rodelio Cabrera ug Maximo Bularan;
Di unta angay'ng manginlabot si De Lima sa panagsungi su'd sa INC tungod sa gimando sa konstitusyon nga separation of church and state; ug
Di angay'ng dawaton ni De Lima ang kaso batok sa INC hangtod nga mahuman ang imbestigasyon sa mga kaso batok sa mga kumander sa Moro Islamic Liberation Front (MILF), Bangsamoro Islamic Freedom Fighters (BIFF) ug private armed groups (PAGs) nga gipasanginlang nimasaker sa 44 ka Special Action Force (SAF) commandos sa Mamasapano, Maguindanao.
* * *
Sa tanang politiko nga nisakay sa protesta sa INC, usa sa labing wa paabota mao ang pagdupa ni Senador Grace Poe sa mga nagprotesta nga nakapasamot sa kahuot sa trapiko ug nanghasi og pipila ka sakop sa media.
Nahulhogan ba lang 'sab sama sa pipila ka sakop sa INC sa Sugbo? o nihaom ang protesta sa iyang pagpangita og mga isyu nga mohanig nang daan sa pagsalikway sa pagdapit sa administrasyon ug paghinayon sa pagdagan pagka presidente?
Daotang balita alang sa mga nikabayo sa INC mao nga nagkagamay ang protesta sa INC ug nisulbong pag-ayo ang popularidad ni De Lima sa social media.
Kasagaran sa mga kumentaryo nihagit na hinuon niya pagbisto sa tinuod nga mga panghitabo sa INC ug pagpasaka og mga kasong kriminal kun mapamatud-ang gigamitan og puwersa ang mga niawhag og kausaban.
* * *
- Latest
