Eskinang di Canduman
Matag higayon nga makalasan og kinabuhi o mabara ang mga sakyanan tungod sa aksidente sa eskina Canduman sa Dakbayan sa Mandaue, modayon og pasalig ang mga tagduma sa trapiko nga mas hugot nilang ipatuman ang mga lagda sa luwas nga pagbiyahe, dugangan ang mga signage nga magpahinumdom sa mga motorista pagsusi sa ilang brake sa di pa molugsong ug pagmatngon sa ilang pagbanus-banos pag-agi sa eskina.
Apan wa gihapoy mahitabo. Nagpabilin ang eskina nga usa sa labing kuyaw nga bahin sa trapiko sa Metro Cebu. Kon di magbantay ang motorista mahimong makabangga. Bisan unsaon og bantay mahimong maoy mabanggaan. Mahimo sang mosimang ang destinasyon sa mga pasahero sa ospital o minteryo.
***
Hinaot nga ang hinungdan nga wa pay mga lakang nga gihimo paghimong mas luwas sa eskina Canduman di mao ang kapakyas sa mga opisyal sa lokal ug nasudnong gobyerno pagtultol sa luna. Kay ang eskina Canduman wa mahimutang sa Barangay Canduman kon dili sa Barangay Basak. Labaw nang way Canduman Road sa mapa sa Mandaue ni sa Department of Public Works and Highways.
Kon ang opisyal nga mapa maoy basehan, ang kinaham sa mga aksidente mao ang eskina sa Cebu North Road ug H. Abellana St. nga pulos national road ubos sa pagduma sa DPWH apan ang mga lagda sa trapiko gipatuman sa Mandaue.
***
Usa sa mga sugyot mao ang pagbutang og traffic light sa eskina. Apan wa ni ipatuman sa Mandaue ug DPWH kay giisip nga makapahinay sa dagan sa trapiko sa nasudnong highway. Wa hinuon sila maghupot og samang panagana sa pagbutang og traffic lights sa ubang mga eskina sa nasudnong highways.
Samang nasudnong highway gibutangan nila og traffic lights sa eskina A.S. Fortuna St. Mahimo wa nila isipa nga sama kamahinungdanon ang H. Abellana. Apan nahibawo silang nagdasok na sang mga sakyanan tungod sa pagkatukod sa Saced Heart School-Ateneo de Cebu sa Canduman. Gani gipalapdan na sa DPWH ang H. Abellana apan nabara sa pagdumili sa mga tag-iya pagpagamit sa pribadong mga luna.
***
Way gihimo ang Mandaue ug DPWH bisan mas naghuot na ang eskina Canduman. Tungod sa pagtrabaho sa taytayan sa Barangay Paknaan nga nakapabara sa trapiko sa Cebu North Coastal Road, nisimang ang mga sakyanan gikan ug paingon sa amihanang Sugbo sa Cebu North Road.
Maong human sa kataposang aksidente nga nakapatay og pastor, nakaangol og walo ka tawo ug nakaguba og napu ka sakyanan, ang masulub-on nga balita mao nga nihimo na sab sa samang pagarpar ang mga tagduma sa trapiko. Ug magsugod na sab ang makapabalaka nga pag-ihap sa mga adlaw hangtod sa sunod nga aksidente sa eskina Canduman. Puhon. Aw simbako diay.
- Latest
