Lagmit magpinusilay

Gikuyawan ko nga makasugat og engkuwentro ang mga sakop sa Land Transportation Office kun tinud-on man g’yud nila sa pagpatuman ang lagda sa Republic Act 10586.

Kini mao ang balaod nga mosilot sa mga drayber nga masakpan nga nagmaneho og sakyanan samtang sila ubos sa gahum sa mga ilimnong makahubog.

Abi ninyo og ngano nga miingon ko nga makasugat ang LTO ug engkuwentro? Dili imposible nga daghan sa mga hubog adunay mga armas kay sila mga polis, militar, sakop sa ubang law enforcement units ug mga sibilyan nga adunay armas.

Kay sila mga hubog nga nagmaneho sa ilang armas, wala na sila sa tukma nga panghuna-huna. Kun aduna man gani panaglalis nga mahitabo tali sa mga road law enforcers ug sa mga dili hubog nga drayber nga dakpon, unsa pa kaha kun sila mga hubog?

Dili kaha pangpusilon ang mga sakop sa LTO nga manakop sa mga hubog? Ang ikaduha nako nga pangagpas, dili kaha maayo lang sa sulti ang LTO nga sugdan na nila pagpatuman ang balaud apan dili sila makahimo?

Ang mga tawo nga hubog nga magmaneho sa ilang sakyanan sagad mahitabo panahon sa lawom na nga gabii ug ngadto na sa kaadlawon. Ang mao nga mga tawo gikan sila sa imnanan ug sa mga party nga ilang gitambongan.

Mo-duty kaha ang LTO sa lawom na nga gabii ug sa kaadlawon? Ha! Ha! Ha! Ha! Dili man gani sila makahimo og operations aron pangdakpon ang mga drayber nga malapason sa balaud panahon sa adlaw, sa gabii pa kaha?

Apan nindot kini nga lakang sa kagamhanan nga estriktohon ang mga drayber nga dili gayud tugotan nga momaneho og sakyanan nga hubog aron paglikay sa aksidente.

Mag-unsa man kun tarong ka nga mopadagan sa imong sakyanan unya dasmagan ka sa kotse sa hubog? Wala pa ko makalimot sa hitabo nga may tawo nga nadam-agan og sakyanan nga gimaneho sa hubog diha sa karsada sa Banilad.

Kay may nakakita man sa plate numbers, ilang gi-verify ug nailhan kinsa ang tag-iya. Giadto sa mga polis didto na sa grahe sa tag-iya dapit na sa Mandaue.

Ang drayber wala makabantay nga ang lawas sa tawo nga iyang nadam-agan naguroy sa iyang sakyanan. Usbon nako, suporta kaayo ko niini nga balaud, apan ang pangutana lang nako kun takus ba ang LTO nga mopatuman niini?

* * *

Nindot ang gihimo sa kontraktor nga gikuha sa Department of Public Works and Highways  pag-aspalto sa kabahin sa Gorordo Avenue unahan sa Barangay Lahug.

Human nila gikaskas ang karsada, inigkagabii ila dayon nga aspaltohon. Nagpasabot nga wala kaayo mahasol ang mga motorista sa ilang gihimo.

Tingali nakakat-on na og leksyon ang DPWH nga naputos sila sa pagsaway sa una nga kontraktor nga ilang gikuha. Ang awhag lang nato mao nga ayuhon unta nila sa pag-aspalto.

Unya, ang kabahin sa Gorordo Avenue dapit sa eskena Sudlon paingon na ngadto sa JY Square, kinahanglan unta nga palapdan unya did-an na g’yud sa CITOM ang paggamit sa karsada nga parkingan lang sa mga sakyanan.

Sa ingon nga paagi masulbad ug gamay ang kahuot sa mao nga bahin sa karsada panahon sa hapon hangtud na sa gabii. Kinahanglan nga ang mga sakop sa CITOM modeklarar nga “No Stopping Area” sa mao nga dapit.

Dunay uban diha nga mga adunay sakyanan apan walay parking area ug anha ra daplin sa karsada iparada ang ilang mga sakyanan.

* * *

Panahon sa hapon ang aseras nga bahin diha sa mao nga dapit hilabihan ka samok kay adunay magluto og barbecue. Usa ka sakop sa Probe Team gipangutana ni radioman Dione Gelbolingo kun ngano nga wala man kini nila himoi og operasyon.

Nasagmuyo siya sa tubag kay giingnan siya nga ang mao nga mga tigluto og barbecue adunay opisyal nga tigdupa-dupa. Mao ba? Unya, ingon diay niini ang himuon sa Probe Team nga kadto ra’ng mga walay nagproteher maoy inyong aksyonan?

Klaroha ninyo ni Ma’am Raquel Arce uy!