Makiglalis ba sa iyang PNP?
Nawani sa padayong lalis sa engkuwentro sa Mamasapano, Maguindanao, nga nibalik pag-ulbo tungod sa findings sa Board of Inquiry sa Philippine National Police nga nibasol nilang Presidente Noynoy Aquino kanhi PNP chief Alan Purisima ug kanhi Special Action Force chief Getulio Napeñas, mao nga nakabuylo ang mga imbestigasyon tungod sa wa pagpanlawgaw ni Aquino.
Mahimong sawayon si Aquino tungod sa pagdumili pagboluntaryo paghatag sa iyang testimoniya ngadto sa BOI, apan di siya kapasanginlan nga nipig-ot sa mga pakisusi sa nagkalainlaing buhatan sa gobyerno sa kamatayon sa 44 ka SAF commandos. Hinaot nga di karon na lang magsugod og maniobra nga nisukwahi siya sa resulta sa imbestigasyon.
* * *
Kon si kanhi presidente Gloria Arroyo pa ang nagtungkawo sa Malakanyang, di unta mahitsura ang mga pakisusi sa trahedya. Kay dihang niulbo ang Hello Garci scandal, nga nanukad sa pasangil nga iyang gitikasan si anhing Fernando Poe Jr. sa piniliayng presidensiyal niadtong 2004, gidid-an niya ang mga opisyal sa gobyerno pagtambong sa mga imbestigasyon nga gilusad sa duha ka bay balaoranan sa Kongreso.
Giluwatan ni Arroyo ang Executive Order No. 464 niadtong Septiyembre 26, 2005 human nitambong ang duha ka opisyal sa militar sa imbestigasyon Hello Garci sa Senate Committee on National Defense ug usa ka semana human naapiki si kanhi national security adviser Norberto Gonzales sa buwag nga pakisusi sa Senado sa nabistong kontrata sa Malakanyang ug sa lobbyist nga Venable LLP sa Washington DC.
* * *
Kon sama pa og panghunahuna si Aquino kang Arroyo, di unta niya tugotan nga makatambong sa daghan uyamot nga public hearings ug executive sessions mahitungod sa Mamasapano silang Interior Secretary Mar Roxas, Defense Secretary Voltaire Gazmin, Justice Secretary Leila De Lima, PNP Chief Leonardo Espina, Armed Forces Chief Gregorio Catapang ug ubang mga opisyal sa gobyerno.
Kon di pa tungod sa kagawasnon sa pamunoang Aquino, di unta mangahas silang Direktor Benjamin Magalong, pangu sa BOI, ug ubang mga imbestigador pagtulisok sa ilang labaw, nga nikalit lang og pamalibad nga di na diay ilang commander in chief.
* * *
Angayng pasidunggan si Roxas nga maoy nagtukod dayon sa BOI nga gitahasan pagsusi sa tinuod nga mga sirkumstansiya sa pagplano ug pagpatuman sa Oplan Exodus. Bisan si Roxas mismo wa kaandam sa kamatinud-anon sa imbestigasyon kay labihan man niyang dupa ni Aquino ug gitingob ang tanang tulisok ngadtong Purisima pagkadawat niya sa 120 ka pahina nga report niadtong Biyernes.
Uwahi na kon isalikway ni Aquino ang resulta sa opisyal nga imbestigasyon sa kapolisan. Human isalikway ang iyang pagka commander in chief sa PNP, nga mapagarbuhon pa niyang giangkon sa gradwasyon sa PNP Academy niadtong 2013, makig-away na ba sab karon sa iyang kaugalingong mga polis?
- Latest
