Tubag sa lindog ni Mr. Lastimosa

Dili tinuod nga hilom ug tak-om ang BAYAN sa isyu sa kurapsyon ni Bise Presidente Jejomar Binay, ang BAYAN nagpagawas og mga posisyon nga kinahanglang tubagon ang mga aligasyon sa kurapsyon diin gilambigit si Bise Presidente Binay, sa mga protesta sa BAYAN apil sa panawagan nga ang “LAHAT NA SANGKOT DAPAT MANAGOT.” Pagtaral ug pagsilot sa mga nahilambigit sa pangurakut apil na niini ang mga suod ni Presidente Aquino.

Apil ang BAYAN Central Visayas sa nagduda sa motibo sa imbistigasyon sa senado bahin sa aligasyong kurapsyon ni Bise Presidente Binay, diin giingon nga pinakataas nga imbestigasyon nga miabot na kini og 14 ka hearing kon ang tinguha sa senado in the aid of legislation, dili ba taas ra kini? Samtang ang imbistigasyon sa Mamasapano encounter sa ubos balay balaoranan gipugngan ug gustong undangon bisan kon daghan ang mga kongresista ang gusto kini nga ipadayon ug kinahanglang moatubang si Presidente Noynoy Aquino aron matubag ang daghang pangutana nga ang presidente ra ang makatubag.

Daghan na nga mga grupo karon nga nanawagan pagpa-resign kang Presidente  Noynoy Aquino naay mga tawo ni kanhi President Arroyo ug mga dumadapig ni Bise Presidente Jejomar Binay. Klaro ang posisyon sa BAYAN sa mga hinugdan sa panawagang pagpa-resign ni Presidente Noynoy Aquino, dili lang sa palpak nga top secret operation sa Mamasapano Maguindanao nga mikalas og 44 ka PNP-SAF nga hangtud karon padayong nanghinaw ug namakak si Noynoy Aquino sa iyang kalambigitan sa maong operasyon. Palpak sa Pagluwas sa mga gi hostage nga mga hongkong national sa Luneta, palpak sa pagtubag sa demanda sa mga survivors sa bagyong  Yolanda, palpak sa pagpahiluna sa mga bakwit sa Zamboanga siege nga giingong hangtud karon anaa pa kini nagpuyo sa tent area, palpak sa pagtubag sa demanda sa mag-uuma sa tinuod nga reporma sa yuta nga usa sa ehemplo niini ang Hacienda Luisita nga bisan sa kamanduan sa korte suprema nga ipanghatag na kini sa mag-uuma apan padayon nga nagmaniubra ang pamilya ug si president Aquino nga usa sa mga tag-iya sa HLI, palpak sa pagtubag sa demanda sa mga mamumuo ug mga empleyado sa gobyerno hisgutanan sa ensaktong suholan aron maka-apas sa hilabihan nga pagserit sa presyo sa mga nag-unang palaliton, palpak ang palisiya sa pagtubag sa kawalay katrabahoan ug kaseguroan sa trabaho, padayong gipatuman ni Aquino ang mga palisiya sa ekonomiya ug kasabutan nga gimando sa Estados Unidos sama sa VFA - Enhanced defense Cooperation Agreement kon EDCA, kapalpakan sa “WALANG KURAP WALANG MAHIRAP” ug sa “DAANG MATUWID” nga gisubay ni Aquino kay hangtud karon daghan ang kabus ug gigutom nga Pilipino ug padayon ang pagdupa ni PNoy sa iyang mga alyado nga nahilambigit sa pork barrel scam, pagmaniubra nga mahatagan og dakong budget isip presidential pork aron makontrol ang kongreso. Kini ang bug-at nga hinungdan nganong nanawagan ang BAYAN sa pagpa resign kang Pres Aquino.

Duha naka pag-alsa sa katawhan o people power ang nilampos, ang EDSA 1 napalagpot ang diktadorang Marcos ang EDSA 2 napalagpot si Pres Erap Estrada. Gikan sa mga gagmayng protesta ngadto na sa dakong bul-og sa katawhan nga wala na mahadlok sa presidente nga gikasilagan. Igo lang nag-ilis og nagdumala sa malakanyang apan ang gipaabot sa mayoriya sa katawhan nga ma-usab ang ilang kahimtang wala matuman. Mao nga sa matag presidente gikan ni Cory Aquino hangtud karon sa iyang anak nga president  sa atong nasud padayon ang BAYAN, ug ang pukaw nga katawhan nga nagsaway sa palisiya ug programa nga wala makatubag sa panginahanglan sa kabus ug gipahimuslang Pilipino.

Ang People’s Council for National Unity, Reform and Peace maoy temporaryong ipuli o transition government kon mopahawa o mapalagpot si PNoy. Modumala ang People’s Council gikan sa usa ngadto sa duha ka tuig sa atong gobiyerno. Dili i-apil sa People’s Council ang mga traditional politicians ug mga dagkong negosyante.

Ang People’s Council nagrepresentar kini sa mga individual ug gikan sa mga sector/hut-ong nga nakigbisog aron mapahawa o mapalagpot si Pres. Noynoy Aquino sa malakanyang. Mga indibidwal ug gikan sa sector/hut-ong nga kaniadto pa nakigbisog alang sa tinuod nga kalingkawasan gikan sa kontrol sa langyaw sa ekonomiya, politika, kultura ug militar.

Trabaho-on sa People’s Council ang mosunod:

•Ipabarug ang usa ka independenteng komisyon nga mo imbestigar ug motaral sa sad-an sa trahedya sa Mamasapano;

•Hawanan ang dalan alang sa limpyo ug matinud-anong eleksiyon, mohimo’g reporma aron malikayan ang panikas, pagdili sa mga political dynasty ug maminusan ang patronage politics;

•Wagtangon ang pork barrel system, taralon ug silotan ang nahilambigit sa PDAF ug DAP, mosiguro nga dunay transparency pinaagi sa freedom of information law, accountability sa gobiyerno pinaagi sa balaod nga manalipod sa mga whistleblower pinaagi sa whistleblower law.

•Ipatuman ang mga nangunang patakaran sa pang-ekonomiya alang sa tinuod nga reporma sa yuta, nasudnong industriyalisasyon, pagpataas sa kita, seguridad sa pagkaon ug katilingbanong batakang serbisyo para sa kabus ug tungatungang hut-ong.

•Wagtangon ang usa ka bahin nga mga kasabutan sama sa Visiting Forces Agreement (VFA), Mutual Logistics Support Agreement (MLSA) ug Enchanced Defense Cooperation Agreement (EDCA).

•Pagpadayon sa negosasyon sa kalinaw sa NDFP ug sa MILF pinaagi sa pagtuman sa mga miaging kasabutan ug pagsulbad sa ugat hinungdan sa armadong pag-alsa.

Gahum sa katawhan o People Power ang pamaagi aron moresign o mapugos pagpa-resign ang rehimeng Aquino ug ipuli ang People’s Council, karon na ang panahon dili na kita makapaabot sa 2016 eleksiyon, dili na nato madawat ang mga political dynasty, palpak nga automated electoral system gahum sa kuwarta nga maoy motakda sa atong kapalaran ug kaugmaon.

Dili pud tinuod ang giingon sa kapolisan nga 100 ang nisalmot sa martsa rally sa BAYAN CENTRAL VISAYAS niadtong February 25, 2015 atol sa ika 29 ka tuig sa EDSA I ug usa ka bulan sa nahitabong engkuwentro didto sa Mamaspasano Maguindanao, sa ihap namo katuloon ka pilo ang nanambong base sa estimate sa kapolisan way labot sa katawhang naminaw didto sa dalan colon.

Daghang salamat,

Jaime Paglinawan

Chairman-Bayan Central Visayas