Pagpuril sa lasang
Laya, Kalunasan, Cebu City – Mahimong maapiki ang developer nga gipasanginlang namutol og kahoy sa luna nga himuon niyang subdivision dinhi. Giklaro sa Department of Environment and Natural Resources nga samtang gihatagan na nila og Environment Compliance Certificate (ECC) ang proyekto way pagtugot ang developer sa pagpamutol sa mga punoan sa kahoy.
Mag-atubang og posibleng multa, pagkasuspenso ug bisan pagkapriso ang kadagkoan sa 8990 Housing Development Corporation nga maoy nagduma sa Deca Homes Guadalupe Project. Susihon sa DENR ang pasangil sa mga molupyo dinhi nga ang kanhi baga nga lasang karon hingpit nang naupaw ug nga ang kabilin nga among naabtan mao na lang ang nagbad-ay nga nagkadugta nang mga punoan sa kahoy.
***
Nakuha sa programang Tubag! sa ABS-CBN Channel 3 ug DYAB Abante Pa, Bisaya! ang ECC sa proyekto nga giluwatan ni William Cunado, OIC Regional Director sa Environmental Management Bureau sa Central Visayas, niadtong Pebrero 26 sa niaging tuig nga maglakip sa:
• 408 ka pinuy-anan sa 19,684 square meters nga luna;
• Bakanteng luna alang sa agianan sa taga gawas (easement) nga 1,173 square meters;
• Kadalanan sa 9,441 square meters;
• Wastewater management facility;
• Solidwaste management facility; ug
• Hawan nga 1,440 square meters.
***
Apan gitataw ni Dr. Ed Llamedo, public information officer sa DENR sa Central Visayas, nga ang ECC di magamit sa developer sa pagpamutol sa mga kahoy. Gani, usa sa 16 ka kundisyon sa ECC mao ang pagdili sa pagpamutol og mga kahoy atol sa pagpatuman sa proyekto. Kun di gyud kalikayan ang pagpamutol, ang tanang maapektahan nga mga kahoy kinahanglan nga luwas nga lukahon ug ibalhin sa laing dapit.
Di hinuon makahimo ang developer pagbuutbuot ini. Gimandoan siya sa ECC sa pagkuha og pagtugot gikan ni DENR Secretary Ramon Jesus Paje. Matod ni Llamedo way nadawat nga bisan unsang aplikasyon gikan sa developer ang Community Environment and Natural Resources Office (CENRO) sa Dakbayan sa Sugbo, ni ang rehiyonal nga buhatan sa DENR.
***
Unsay mga silot nga mapaabot batok sa developer sa Deca Homes? Matod ni Llamedo kon mapamatud-an sa ilang imbestigasyon nga gipamutol gyod ang mga punoan sa kahoy nga way pagtugot, human sa ilang ocular inspection sa project site ug imbentaryo pila ka punoan sa mangga, Narra, Talisay, G-melina ug ubang kahoy, mahimong mapahamtang ang mosunod:
•P50,000 nga multa sa matag kalapasan sa 16 ka kundisyon sa ECC;
•Pagkasuspenso sa Deca Homes Guadalupe Project ug sa ubang mga proyekto sa developer sa Sugbo ug ubang bahin sa nasud; ug
•Lima ka tuig nga pagkapriso sa kadagkoan sa 8990 Housing Development Corporation kon makonbikto sa buwag nga kasong kriminal nga ilang ipasaka.
- Latest
