Pakauwaw sa Kongreso
Pagsugod pa lang di na masaaron ang imbestigasyon sa House of Representatives sa trahedya sa Mamasapano, Maguindanao. Naabtan ang mga kongresista og dul-an sa tunga sa oras sa pagpaila sa nanambong nga mga sakop sa duha ka komitiba nga nagduma sa imbestigasyon, Public Order and Safety ug Peace and Reconciliation, ug sa gidapit nga mga opisyal sa Malakanyang, militar ug kapolisan ug sa mga reklamo sa mga kongresista nganong wa katambong ang pipila ka opisyal.
Naabtan na sab sila og laing tunga sa oras sa pagtuki angay bang itakda ang laing hugna sa imbestigasyon. Nahuman lang ang lalis dihang may nakahinumdom nga di maayong maghisgot na sila og lugway kay wa pa man silang kasugod.
***
Ang nisunod nga oras nahurot lang sa pagsubli sa bahaw nang mga asoy sa kapolisan ug militar sa pasiunang kasayuran nga ilang nahipos mahitungod sa engkuwentro nga nikalas og 44 ka sakop sa Special Action Force (SAF) sa Philippine National Police (PNP) niadtong Enero 25.
Apan nagsige lang gihapon og sal-ot ang mga kongresista sa ilang pagkuwestiyon sa mga lagda sa imbestigasyon. Nakasugod na lang og pangutana ang mga kongresista sa ilang gidapit nga resource persons paglabay sa duha ka oras. Apan nagpabiling mas taas ang ilang sal-ot nga mga paniid kay sa ilang mga pangutana.
***
Taliwa o tungod ba kaha sa kayagaw nakabuylo si Deputy Director General Leonardo Espina, ang kasamtangang hepe sa PNP nga gibutaan sa operasyon, pagpabuhagay sa iyang emosyon tungod sa nahibaw-an nga dugang detalye nga may SAF commandos nga buhi pa unta apan gitiwasan pagpatay ug gipanamastamasan ang ilang mga patay’ng lawas.
Gitugbangan sab dayon siya og mga luha ni Kongresista Bai Sandra Sema sa Maguindanao. Kinsa nitataw sa kadinalian sa panginahanglan sa pagpasar sa Bangamoro Basic Law (BBL). Matud niya ang kalangay sa BBL magkahulogan sa dugang pag-antos sa katawhan sa Bangsamoro sa mas dakong hulga sa duguong kagubot.
***
Nakatampo sa kaguliyang sa mga kongresista ang ilang kadaghan ug ang way lipudlipod nilang kahinangop sa kadaghan sa TV cameras ug mga sakop sa media nga nisibya nga buhi sa tanan nilang sulti. Ug pakauwaw. Wa sab katabang paghimong mapuslanon sa kalihokan ang tsirman sa komitiba sa Public Order and Safety, si Kongresista Jeffrey Ferrer sa Negros Occidental, nga gawas nga kadudahan ang katakos pagduma sa pakisusi mao pa usahay ang mag-una-una og tulibagbag.
Human sa House, turno na sab sa Senado. Nga gitakdang mopahigayon sa ikatulong adlaw sa ilang pakisusi. Wa pay labot ang posibleng sumpay nga mga pakisusi sa duha ka bay balaoranan sa sunod semana. Tungod sa paghigot sa Kongreso sa tanang nahilambigit sa trahedya, mahimong mas malangay ang hustisya sa mga biktima.
- Latest
