Baktas sa hustisya
Nalangay ang pagsugod sa martsa sa kapolisan gikan sa IT Park paingon sa Kampo Sergio Osmeña Sr. gahapon sa kadlawon tungod sa kusog nga bunok sa uwan. Apan way bisan usa sa kapin sa 500 ka unipormadong mga polis ang nipadayag og pagduda nga mahinayon ang ilang kalihokan pagbangotan, pagpahasubo ug pagpangayo og hustisya sa pagkapukan sa 44 nila ka kaubanan sa Mamasapano, Maguindanao.
Inay alas-4:30, alas-5:30 na nakasugod ang lima ka kilometro nga baktas nga nilungtad og usa ug tunga ka oras. Dihang nagtutaligsik pagtungas nila sa Escario, way nagpasilong. Nagkauyon nga gamay ra kaayo ang ilang sakripisyo kun itandi sa pagbuhis og kinabuhi sa gimasaker nga Special Action Force (SAF) commandos.
* * *
Duol na sila sa nagbuntaog nga Kapitolyo sa Sugbo dihang among nabantayan nga way nakahunahuna pagda og megaphone, ni trumpa. Way nagtagad paghimo og pakigpung, ni pagsiyagit og slogan ug bisan unsang panawagan.
Diriyot ko matental pagsungog sa kadagkoan sa kapolisan nga lupig sila sa militanteng mga pundok sa kasaba pagpahibawo sa tanan nilang malabyan sa ilang mga mensahe. Hangtod nga akong namatngonan nga taliwa sa kinatibuk-ang kahilom ang mga nagbaktas ug ang mga sibilyan nga ilang nalabyan nagkasinabtanay ug nagkahiusa sa ilang kawsa.
* * *
Pagliko sa pangunahang bahin sa Osmeña Boulevard, way nakapugong sa paglingi sa nagsunod nilang asul nga lawod sa mga unipormado: Hilom, ligdong ug determinado. Ang kamakahuloganon sa baktas mas sipa kay sa bisan unsang diskurso. Mas tukma ang paghulagway sa protesta sa katapad nako sa baktas, si Atty. Ralph Sevilla, kanhi Resource Development Head sa Cebu City Hall: Morang hilak nga luha ray makita.
Wa mahitabo ang gikabalak-ang pagkabara sa trapiko. Kay ang dagkong opisyal sa kapolisan, nga beterano sa pagduma sa komplikadong mga operasyon batok sa labing banggiitang mga kriminal ug mga terorista, nipasundayag sa kasayon sa kasamtangang pagpasimang sa naapektahang mga ruta. Nakatabang sab nga mas katahaan ang ilang barug ug uniporme kay sa kasarangang traffic enforcers.
* * *
Pagsud namo sa headquarters sa Police Regional Office sa Central Visayas, gisugat ang kapolisan sa mga buwak sa ganghaan nga gihad sa mga sibilyan. Ang mga tigpanalipod sa katawhan nagkinahanglan sa ilang tabang ug pagdasig. Gitapos ang kutas nga baktas pinaagi sa tim-os nga mga pangaliya sa Santos nga Misa.
Atubangan sa mga hulga sa pagwelga sa kapolisan, makatandog ug makahupay ang mensahe sa SAF sa paghaya sa napukan nilang mga sakop: "Samtang naglipay uban sa kaparyentihan ug kahigalaan, ug sa kaluwas ug kasayon sa inyong kabalayan, may mga nagsakripisyo sa ilang panahon, kahago ug kinabuhi aron pagtuman sa ilang katungdanan paghatag ninyo og normal nga kinabuhi. Sila ang kalalakin-an ug kababayen-an sa SAF, mga polis nga kamaong magpakamatay."
- Latest
