Biyahe sa Sugbo ug Leyte
Pila ka buwan human sa bagyong Yolanda, nakadungan namo sa barko gikan sa Sugbo paingon sa Leyte ang dakong opisyal sa usa ka relihiyusong pundok. Managsama ming nagda og relief goods alang sa mga biktima sa bagyo. Nagsige na siya og balikbalik kay daghang sakop sa ilang simbahan ang naigo sa katalagman di lang sa Leyte apil na sa mga lalawigan sa Samar.
Nitambag siya nga ang labing laktod ug sayon nga agianan paingon sa Tacloban City, nga maoy labing naggusbat ni Yolanda, mao ang Ormoc City: Kapin sa duha ka oras ra sa fast craft gikan Sugbo ug duha ka oras ra sa V-Hire paingon sa Tacloban.
***
Iyang tambag maoy nakaaghat sa among kaubanan sa TV Patrol Central Visayas pag-agi sa Ormoc sa lapad nilang pangandam sa coverage sa unom ka oras nga pagduaw ni Pope Francis sa Tacloban ug Palo karon nang Sabado, Enero 17. Apan labihan nilang sayopa.
Naputol diay sa bagyong Seniang ang pipila ka taytayan ug kadalanan gikan sa Ormoc paingon sa Tacloban. Mao nga ang duha ka oras untang biyahe nainat ngadto sa lima ug nipadpad pa gyod nila ngadto sa libaungon kaayong alternatibong mga agianan. Ang mga taga Leyte nitambag nga mas maayong agian ang Baybay City sa mga gustong makakita sa Santo Papa sa Tacloban ug Palo.
***
Gipakaingon gyod nako nga nahalin nang tanang tiket sa tanang umaabot nga mga biyahe sa mga barko gikan sa Sugbo paingon sa Leyte. Nga labihang lisora na kon karon pa magkarakara pagbiyahe paingon sa Tacloban ug Palo.
Maong nakugang mi pagkahibawo gikan sa mga kompaniya sa barko nga daghan pang bakante sa ilang mga biyahe paingon sa Leyte. Si Jose Emery Roble, Presidente ug CEO sa Roble Shipping Lines, kansang mga barko makahatod og duha ka libo ka pasahero gikan ug paingon sa Sugbo ug Leyte matag adlaw, niingon nga mas daghang pasahero gikan sa Leyte para Sugbo aron pagsimba sa Piyesta Senyor ug pagsaksi sa Sinulog kay sa mga nagpareserba pagsugat sa Santo Papa.
***
Pulos gihulga sa umaabot nga bagyong Amang ang Sugbo ug Leyte karong weekend. Apan way bisan usa sa mga namiyahe paingon sa Leyte nga among gikahinabi nga nahadlok nga bagyuhon ang misa ug ubang kalihokan ni Pope Francis sa Tacloban ug Palo. Samang wa say usa sa mga nikawas sa pantalan sa Sugbo para Sinulog nga nibalik tungod sa pasidaan sa PAGASA nga mahimong kusog ang bundak sa uwan ug huros sa hangin atol sa piyesta ni Sr. Sto. Niño.
Salamat sa bag-ong mga teknolohiya masaksihan sa mga Sugbuanon ang magkadungan nga duha ka dagkong kalihokan sa Piyesta Senyor ug ni Pope Francis. Bisan mag-bagyo. Simbako. [email protected]
- Latest
