Pamiyesta ni Amang
Basilica del Sto. Niño, Cebu City -- Kusog nang huros sa hangin dinhi nga, pun-an sa pagtabon sa nipis nga dag-om sa kainit sa adlaw, nakahimong sayon sa pagtambong sa kaliboan ka deboto sa 11 ka novena masses matag adlaw ug bisan sa pagbaktas paingon ug gikan dinhi kay gitak-opan na man ang naglibot nga kadalanan.
Mas mokusog pa gyod ang hangin sunod semana, pasidaan ni PAGASA Visayas Director Oscar Tabada. Gidasonan sa ulohang buhatan sa PAGASA ang iyang forecast sa niagi pang semana nga dako ang kahigayonan nga makasud sa Pilipinas ang low pressure area nga naa pa sa Pasipiko. Kon mahimong bagyo nganlan og Amang, ang labing una sa 2015.
***
Sa akong pagsuwat ini, natultolan sa PAGASA ang LPA nga nahimutang duha ka libo ka kilometro sa silangang Mindanao. Gipaabot nga mosud na sa Philippine Area of Responsibility karong Lunes. Makapasamot ni sa kakusog sa amihan, nga maoy responsable sa pagtidlom sa temperatura sa Sugbo ug ubang bahin sa Kabisay-an sa niaging mga adlaw.
Magsugod na og bubo og uwan ang LPA sa Tacloban City ug Palo sa Leyte ug ubang bahin sa silangang Kabisay-an karong Huwebes, Enero 15, nga maoy pagtugpa ni Pope Francis sa Villamor Air Base sa kaulohan gikan sa Colombo, Sri Lanka. Magsugod ang uwan dinhi sa Sugbo ug Central Visayas karong Biyernes, Enero 16, kanus-a gipaabot nga ang LPA mahimo nang Amang.
***
Magpadayon ang uwan sa Tacloban City ug Palo karong Sabado, Enero 17, atol sa unom ka oras nga pagduaw ni Pope Francis kanus-a magmisa siya sa Tacloban Airport ug maniudto sa Palo uban sa mga biktima sa bagyong Yolanda sa silangang Kabisay-an ug sa linog sa Bohol.
Nitataw hinuon si Tabada nga ang uwan ug huros sa hangin nga da ni Amang di igong sukaranan sa pagkanselar sa pagtugpa sa ayroplano ni Pope Francis sa Tacloban. Gawas lang kon mokisdom sab pag-ayo ang palibot nga maapektahan nang visibility.
***
Mameligro ang fluvial procession nga gitakdang sugdan sa Mactan Channel tulo ka oras sa di pa motugpa si Pope Francis sa Tacloban. Nipasidaan nang daan ang Philippine Coastguard nga kanselahon nila ang prosesyon sa kadagatan nga mohatod pagbalik sa imahen ni Sr. Sto. Niño sa Dakbayan sa Sugbo kon modagko ang bawod.
Di pa mabanabana nilang Tabada ug kaubanan sa PAGASA unsa kadagko ang bawod nga mamugna sa 25 ka kilometro matag takna nga hangin sa sayong buntag karong Sabado. Sa ilang bahin, andam ang Sinulog Foundation kon bagyuhon ang Sinulog Grand Parade. Kon di na luwas ang pagsayaw sa kadalanan, ibalhin nilang sayaw sa contingents sa Cebu Coliseum nga nahimutang pila ka metro gikan sa Cebu City Sports Center.
- Latest
