Pribadong kaluho ni Binay
Gihulagway ni Bise Presidente Jejomar Binay ang tulo ka adlaw niyang pagduaw sa Sugbo nga pagtuman sa iyang trabaho pag-alagad sa mga kabos. Gisuroy niya ang kamerkadohan, gihangop ang mga mamaligyaay ug mga representante sa ubang kabos nga mga sektor, nakigsawo og pagkaon ug nagpahulagway uban nila ug nanghatag nila og T-shirts ug candies nga dunay iyang nawong, ngan ug pirma.
Mao na ang hulagway nga iyang gipasundayag atubangan sa publiko: Makig-uban ug makab-ot siya sa labing yanong mga molupyo, andam sa pagpaminaw ug pag-atiman sa labing dinalian nilang mga panginahanglan. Apan bisan dinhi sa Sugbo lahi ang iyang pribadong kalibutan.
***
Gipasanginlan si Binay nga maoy tag-iya sa 350 ka ektarya nga asyenda sa Rosario, Batangas, nga may harianong mansion, pavilion, kew garden, orchard, kuwadra sa kabayo ug piggery. Gipasanginlan sab siya nga nihimo sa iyang pinuy-anan nga morang museum sa labing mahalon nga antiques ug paintings.
Gipasanginlan siya nga nanag-iya og mahalon nga condominium units sa Makati ug luho nga mga balay bakasyonanan sa Tagaytay ug ubang mga lalawigan. Apan gipasanginlan sab siya nga nitago sa nagtumpi niyang katigayonan di lang sa mga botante kun dili hasta sa iyang statement of assets, liabilities and net worth (SALN).
***
Mao ni pinuy-anan ni Binay sa Sugbo, nga maoy iyang gidangpan human nakig-uban sud sa pila ka oras uban sa kabos nga mga Sugbuanon: May kaugalingong infinity swimming pool, may pribadong outdoor garden, may eksklusibong agianan paingon sa baybayon nga puti ug pino ang bas, may kaugalingong butler (suluguon) ug hingpit nga panglantaw sa kadagatan ug pribadong pakighiusa sa kinaiyahan.
Di barato ang iyang pinuy-anan – kapin sa P30,000 matag adlaw. Igo nang itukod og payag sa kabos nga pamilya. Igo nang ikapada og hangtod tulo nila ka anak sa kolehiyo. Igo nang ikapatambal o bisan ikapaopera pa sa ilang mga masakiton. Igo nang ikapasiugda og di lang boodle fight kun dili tinuod gyong kumbira uban sa ilang mga silingan.
***
Wa pabayra si Binay sa bag-o ug luhong beach resort nga iyang gipuy-an sa amihanang Sugbo. Kay iyang mga alyado sa politika ang nanag-iya nga pamilya. Di hinuon hingpit nga libre ang iyang pagpuyo. Kinahanglan nga bugtian pinaagi sa pagpaggamit sa gamhanan niyang politikanhong makinarya alang sa kandidatura sa ambisyusong mga sakop sa pamilya.
Usa nila gitakdang modagan pagka bise gobernador sa Sugbo sa piniliay sa 2016. Kanus-a ibandera ni Binay ang hagbay ra niyang gilusad nga kandidatura pagka presidente ug ang iyang giinsistir nga kumpletong lumbay sa mga piliunon alang sa lokal nga mga katungdanan. Ug ang iyang sayop nga pagtuo nga hangtod sa hangtod niyang mabutaan ang kabos ug burong nga mga botante sa iyang pagpaka aron ingnon.
- Latest
