Hustisya sa media
Mokalma og diyutay ang mga pasangil nga nangiyugpos lang ang gobyerno ni Presidente Noynoy Aquino sa mga kaso sa pagpamatay sa mga sakop sa media sa nagkalainlaing bahin sa nasud. Kini tungod sa pagpasaka og kasong pagpatay ug pagkapriso sa politikanhong alyado sa Malakanyang nga gitumbok nga utok sa pagpatay sa peryodista sa Digos City.
Gimando ni Justice Secretary Leila De Lima ang pagpasaka og kasong murder batok ni kanhi gobernador Douglas Cagas sa Davao Del Sur. Gisalikway niya ang sukwahi nga rekomendasyon sa iyang mga piskal sa Digos. Di kapasanginlan si De Lima nga nanggukod sa politikanhon nilang mga kaatbang. Kay si Cagas dakong opisyal sa Nacionalista Party nga alyado sa administrasyon.
***
Tam-is nga bunga sa taas ug kutas nga proseso ang pagkabilanggo ni Cagas, usa sa labing gamhanang mga politiko sa habagatang Mindanao. Kapin sa upat ka tuig nang gipatay si Nestor Bedolido Sr. Ug nahugno nang paglaom sa iyang pamilya alang sa hustisya dihang gibasura ang kaso batok ni Cagas sa piskaliya.
Maayo na lang nga sa makausa pa gipakita ni De Lima ang talagsaon niyang kaisog ug kaligdong. Sinalikway ang politikanhong mga implikasyon pagsukwahi sa iyang mga sakop, gimando niya ang pagkiha ni Cagas. Nga karong napriso na di mahimong makapiyansa alang sa temporaryo niyang kagawasan.
***
Si Cagas ang gitumbok nga utok sa pagpatay ni Bedolido sa nikumpisal nga mamumuno nga si Voltaire Mirafuentes. Si Mirafuentes nga nisurender sa kapolisan pila ka buwan human sa krimen gipaubos na ron sa Witness Protection Program sa gobyerno. Iya sang gilambigit sa kaso silang Mayor Vicente Fernandez sa Matanao, Davao Del Sur (kansang bay maoy iyang gitultol nga gihimoan sa plano), Ali Ordaneza ug Bado Sanchez.
Kusganong gipanghimakak ni Cagas ang pasangil batok niya. Nisurender siya sa kapolisan human ipadakop sa korte. Nagbantay rong mga tagtungod ni Bedolido nga di siya hatagan og special treatment. Kini bisan si Fernandez gipaubos na sa hospital arrest.
***
Gipasanginlan sa kampo ni Cagas nga turutot sa iyang politikanhong mga kaatbang si Bedolido. Kinsa maoy nagduma sa pamantalaan nga gipanag-iya ni Cagas, ang Digos Times, sa wa pa mobalhin pagtrabaho alang sa iyang kaatbang nga si kanhi kongresista Claude Bautista ug sa sinemanang pamantalaan, ang Kastigador.
Bisan unsa pang matanga sa pagka peryodista si Bedolido, di makiangayon ang pagpusil ug pagpatay niya. Ang pagtrabaho alang sa mga politiko sa pipila ka peryodista ug mga magsisibya nagpintal sa kamasulub-on sa kahimtang sa industriya sa media sa nasud. Samtang angayng maningkamot ang media organizations pagpalambo sa industriya, di makiangayon nga hipuson ug pahilumon lang ang mga sakop sa media sa labing laktod ug bangis nga mga paagi.
- Latest
