Tubag ni Erecre

Nisuway mi pagpananghid sa kadagkoan sa militar ug kapolisan aron mahinabi si Roy Erecre, ang gipasanginlang pangu sa mga rebeldeng komunista sa Kabisay-an, samtang gibilanggo sa Dakbayan sa Tagbilaran. Nagsusi mi sa kahimtang sa mga biktima sa linog sa Bohol pila ka buwan nang nilabay busa namasin na lang nga makahapit sa selda ni Erecre.

Nakahinabi kong Erecre sa mga batan-on pa mi dihang iya kong gidapit pagtungas sa iyang kampo sa Chocolate Hills. Human siya nadakpi sa kasundalohan sa Dakbayan sa Davao niadtong Mayo ning tuiga, way pamahayag nga nakuha ang media gikan niya. Gawas sa militanteng kahugpongan nga kusganong niawhag pagpagawas niya sa prisohan. Apan nabawo mi sa pagsuway pakigkita niya.

***

Gipasa mi sa kadagkoan sa militar ug kapolisan ngadto sa Bureau of Jail Management and Penology, nga maoy nagduma sa prisohan sa Tagbilaran. Gipasa sab mi sa lokal nga mga opisyal sa BJMP ngadto sa ilang rehiyonal nga buhatan nga nagbase sa Sugbo. Kay pila ra man mi ka oras sa Bohol, wa na ming kakuha og pagtugot.

Sunod nakong nadunggan naka-piyansa na si Erecre ug nakagawas na sa prisohan. Labihang sukoa sa kadagkoan sa militar ug kapolisan apan wa nila makumbinser ang korte nga angayng tanggungon si Erecre samtang gihusay ang mga kasong gipasaka batok niya. Wa ko magpaabot nga makadawat og laing imbitasyon ni Erecre. Ni nga iyang tubagon ang akong lindog dinhi mahitungod sa iyang pagkasikop.

***

Usa sa gihisgutan sa sinuwat nga pamahayag ni Erecre mao ang pangintriga sa mga tigpamaba sa militar nga ang babaye nga nadakpan uban ni Erecre sa Davao dakong minyo sa laing lalaki. Gipasabot ni Erecre nga ang kaminyuon ni Judith Robles Jaron sa laing lalaki na-anular na niadto pang 2009 ug nga siya nabuwag sa iyang asawa niadto pang 2008. Matod ni Erecre nagpakasal silang Judith agad sa mga lagda sa gobyernong rebolusyonaryo niadtong 2011.

Nipasangil si Erecre nga nisuway ang militar pagbutang-butang og mga ebidensiya batok ni Judith. Kinsa nakaikyas tungod sa tabang sa masa nilang mga dumadapig.

***

Gisubli pagtataw ni Erecre nga ilegal ang pagdakop nila kay pulos sila may pases sa Joint Agreement on Safety and Immunity Guarantees sa sabutsabot sa kalinaw tali sa gobyerno sa Pilipinas ug sa National Democratic Front, siya isip consultant ug si Judith isip liaison sa NDF.

Nipasangil si Erecre nga gikawat ang iyang tulo ka dokumento sa JASIG alang sa 1995 hangtod 2016, Letter of Acknowledgment ni Ambassador Howard Dee, representante sa gobyerno sa sabutsabot sa kalinaw, sa mga tuig 1995-2000, laboratory result sa iyang medical examination, kuwarta nga P4,000 ug ubang personal nga kabtangan nga wa pa iuli sa militar ug kapolisan hangtod karon.

[email protected].