Labing tukmang sinugdanan
Nahadlok kong wa mag-inusara sa pagkahugno sa mga mensahe sa mga dinapit sa media forum sa climate change sa Kapisanan ng mga Brodkaster ng Pilipinas Cebu Chapter. Kon di mahunong ang pagpanamastamas sa kinaiyahan magkadaghan ang maangol o mangamatay gyod sa:
•Mas bangis nga baha tungod sa mas kusog nga uwan;
•Mas kusog nga mga bagyo, nga mahimong moambas sa kapintas ni Yolanda matag tulo ka tuig;
•Mas subsob nga storm surge kay mas lawom nang dagat ug mas kusog nang hangin sa mga bagyo;
•Mas lapad nga pagdahili sa yuta; o
•Mas malukpanon nga heat wave tungod sa di na kapugngan nga padayong pagsaka sa temperatura.
***
Mas pait nga kamatuoran mao nga inay maghugpong ang tanang kanasuran ug katawhan paglikay sa nag-ung-ong nga kalibotanong katalagman, padayon pang gilalisan tinuod ba gyong global warming, kinahanglan ba gyong usbon ang naandan natong kalihokan pagsulbad ini, o pasagdan lang ang kinaiyahan nga sama sa naandan maoy mopahiuli sa naandan natong kahimtang.
Laing higanteng kakulian sa mga kampanya pagkumbinser sa katawhan paghunong sa panamastamas sa kinaiyahan mao nga way dagway ang climate change, kon mahinayon man di mapaabot sa sunod semana, o sunod tuig, tingali sa sunod pang kaliwatan, o kon tinuod nga labihan na kaseryuso, kapugngan pa ba kaha ug unsa may unahon sa kapid-an ka nagbuntaog nga mga gimbuhaton?
***
Gidawat ni KBP Cebu Chairman Jun Tagalog ang hagit sa paghimo og mga lakang pagpanalipod sa kinaiyahan nga molabaw pa sa naandan nga pagbalita, o pagkomentaryo, o pagdasig sa katawhan pagpaluyo sa kalihokan sa nagpakabana nga mga pundok pagpangandam ug pagpanagang sa umaabot nga mga katalagman.
Apan unsa may mahimo sa mga magsisibya sa Sugbo gawas sa tinuig nga pagpananom og kahoy? Pagtahas og mga tigbalita nga magsibya sa labing lab-as ug makahuloganong kasayuran sa kinaiyahan? Paghimo og mga drama nga mopintal sa labing yano nga mga pung ug mabulukon nga mga panghitabo sa kamangtas sa global warming?
***
Human sa media forum, namirma pagpalambo sa kinaiyahan ang kadagkoan sa KBP ug mga dinapit, apil nang mga tinun-an sa University of the Philippines ug Cebu Technological University. Masaligon hinuon kong di kutob ra didto ang ilang pagpanginlabot.
Seryuso, dinalian, kalibogan ug kalibotanon ang suliran. Di mabasol ang katawhan kon mohunong na lang sa pagsuway pagsabot sa nag-ung-ong nga nagbuntaog nga katalagman. Masaligon kong makakaplag ang KBP ug ubang kahugpongan sa labing tukma nilang matampo sa determinadong kampanya. Mosugyot ko nga isip mga magsisibya ang labing unang angayng himuon sa KBP mao ang pagpasalig sa katawhan nga labing mapuslanon ang labing yanong lakang sa labing gagmay nga mga sakop sa katilingban sa pagpanalipod sa kinaiyahan.
- Latest
