Hulga sa tubig sa Sugbo
Marcelo Fernan Press Center -- Atubangan sa pasidaan nga motidlom hangtod 30% ang suplay sa tubig sa Sugbo kon mahinayon ang El Niño karong tuiga, makaangkon og dugang sukaranan ang kabalaka sa katandugon sa suplay sa tubig sa Metro Cebu. Nakapasamot sa kahadlok sa mga Sugbuanon nga way makasulti nila pila ang inadlaw nga konsumo ug pila na lay nahibilin sa atong tinubdan.
Nabisto atol sa media forum sa Kapisanan ng mga Brodkaster ng Pilipinas Cebu Chapter, nga usa sa kalihokan sa Broadcasters Month ug Press Freedom Week, nga way buhatan sa gobyerno nga nagbantay ug labaw nang way nakabaraw sa pinatuyangan nga pagsuyop sa mga tinubdan sa tubig ilawom sa yuta.
***
Nahingpit ang kalibog sa tinuorayng kahimtang ug lahutay sa suplay sa tubig sa Metro Cebu dihang gibasura sa Korte Suprema niadtong 2007 ang pangangkon sa Metro Cebu Water District nga sila ra ang bugtong maka-suplay og tubig sud sa ilang franchise area sa Metro Cebu.
Nanguhong dayon ang pribadong mga kompaniya sa tubig. Sa sinugdanan, ang mga dapit nga wa ma-serbisyohi sa MCWD ang ilang gi-suplayan og tubig. Apan karong bag-o gisapawan na nilang MCWD bisan sa mga dapit nga may igo nang suplay sa tubig, ginamit ang mas ubos nga presyo nga ilang gitanyag.
***
Ubos sa balaod, way bisan kinsa nga makasuyop og tubig gikan sa ilawom sa yuta kon di mananghid sa National Water Resources Board. Nga kasagaran mo-aprobar sa mga aplikasyon sa pribadong mga kompaniya nga nag-negosyo og tubig sa way pagkonsulta sa MCWD ug lokal nga mga opisyal. Wa say igong mga kawani ang NWRB nga makasusi sa mga dapit nga butangan og mga bomba sa tubig. Ni sa pagsukod sa aktuwal nga ang-ang sa suplay sa tubig sa Sugbo.
Nahibawo na ka kinsay angayng tulisukon ning pagpatuyang sa pagsuyop sa tubig sa Sugbo: Ang mga negosyante og tubig nga wa magpakabana makalahutay bang mga tinubdan ug ang inutil nga NWRB.
***
Nikumpisal silang MCWD General Manager Ernie Delco ug Environment Water Resources Manager Lasaro Salvacion nga bugtong nilang naseguro nga mas daghan ang gisuyop nga tubig sa pribadong mga kompaniya kay sa inadlaw nga konsumo sa MCWD. Maong mas nidako ang hulga sa paglapad sa mga tinubdan nga nasudlan sa dagat.
Wa hinuon sila mangiyugpos. Nisud sila og memorandum of agreement uban sa NWRB ug local government units aron mabadlong ang ilegal nga mga bomba sa tubig. Nipaluyo na sa kampanya ang mga dakbayan sa Sugbo, Mandaue ug Lapulapu. Nanghinaot ang MCWD nga mosud sab og MOA uban nila ang ubang LGUs sa Metro Cebu. Makatabang sab sa kawsa kon tultolan sila sa nagpakabana nga mga molupyo.
- Latest
