Lihoka ni Mayor Mike!

Karong panahona bisan pa og aduna ka'y guwardiya nga kauban apan dili 'sab abtik nga mobantay, patay gihapon ka kun aduna g'yuy tawo nga buot mopatay nimo. Motuo ka dili?

Nahinumdom ba kamo ni Atty. Noel Archival nga adunay duha ka "bata-bata" nga kauban gawas sa iyang drayber? Unsay nahitabo ni Archival dihang kini gibanhigan? Patay gihapon kay kompiyansa ra man ang mga guwardiya.

Si Mayor Michael Rama kagahapon miawhag sa mga magpapatigayon nga nakabantay nga adunay mga tawo nga nagtinguha og kadaotan kanila nga mokuha og guwardiya. Nindot nga tambag kun ang guwardiya abtik.

Kun magsakay og sakyanan, ang guwardiya kinahanglan nga maglingi-lingi ug maniid sa mga sakyanan nga nagsunod kanila. Apan kun ako ang adunahan nga mokuha'g guwardiya, tudloan nako sila'g unsay angay'ng himuon.

Lakip ang mga drayber angay nga masayod unsay angay nga himuon kon makabantay siya nga adunay mga sakyanan nga nagsunod-sunod kanila ug gituohan gisakyan sa mga nagtinguha'g dautan sa iyang agawon.

Sa laktod, ang drayber kinahanglan nga masayod unsay paglikay ang mga naghimo og "surveillance" o nagsunod kay mohimo na og dautan kanila.

Bitaw, pa-lecture mo sa "intelligence" aron kamo masayod unsaon pagpahigayon ang surveillance nga magsakay ug ang pag-ikyas kun ikaw ang gi-surveillance.

Gibanhigan kagahapon ang usa ka negosyante didto sa Guadalupe ug naapil pa intawon pagkaangol ang iyang batan-ong anak. Kini maoy nakaaghat ni Mayor Rama pag-awhag nga kinahanglang ang mga magpapatigayon angay na nga mokuha og guwardiya.

Awhag lang hinuon nako nga kadtong mokuha og guwardiya ayaw pagkuha og basta-basta na lang kay maantigo mopabuto. Kinahanglan usab nga gawas nga bansay sila mogamit ug mopunting sa armas, angay sila nga dili hadlokan.

Tingali unya og mokalit lang og gamit sa armas ang kuhaon nila nga guwardiya bisan og dili pa kini kinahanglan nga gamiton. Mao kana ang gitawag og "over-acting."

Ayaw mo pagtuo nga ang tanang sakop sa mga security agency bansay nga mogamit og armas kay ang tinuod, daghan kanila ang wala gani makabansay-bansay pagpunting gamit ang armas.

Kun mga tawo nga adunay "background" sa polis ug militar, o kaha firearms basic course, aw kana, arang-arang na lang. Usbon nako, karong panahona, kuyaw na kaayo ang sitwasyon.

Nakaingon lagi ko nga kun may armas pa lang ko maayo na unta magdala'g armas. Bisan og wala ko'y armas, apan nasayod ko unsaon kini paggamit kay nakatambong man ko og mga seminar kabahin niini.

***

Atensyon mga opisyal sa dakbayan. Tan-awa ra gud ninyo ang taytayan diha sa dalan Mabini nga giagian sa Parian Creek. Makita nimo nga ang katunga sa sapa giukopar na nianang balay nga ang silong barberohan.

Dili ba maayo nga palapdan nato ang mao nga sapa ug ibalik nato sa naandam nga gidak-on? Unsay ikasulti nimo Mayor Michael Rama. Sayod ko nga ang mayor kanunay nga mobasa sa akong lindog.

Makita man g'yud nimo nga ang barandilya nga semento sa taytayan, nabinlan na lang og katunga. Klaro kaayo nga ang katunga sa taytayan giabot na nianang balay nga ang silong tupihanan.

Anam-anam na nako nga natimbang-timbang nga kun ibalik nato ang naandan nga gidak-on sa sapa nga gitawag og Parian Creek, unya palawman kini kanunay, sigurado ko nga masulbad ang pagbaha dinhi sa downtown area.

Maayo unta og ang pangulo sa Reduce Danger Zone in Rivers (Red-R) motan-aw niini nga mga sapa. Apil ang sapa nga anaa molagbas sa dalan Sikatuna, nahimo na lang mora'g kanal.

Ang mao nga tulay gihimo kaniadto'ng 1920 ug sa paghimo sa mao nga taytayan, lapad pa ang sapa. Karon ang sapa kanal na lang tungod sa mga mapahimuslanon sa higayon.

Mga tag-iya og balay-patigayon ug mga balay daplin sa sapa mihimo og riprap nga nakapagamay sa sapa nga mosanggab unta sa tubig gikan sa Barangay Day-as aron adto huwad sa sapa sa T. Padilla.

Kay gamay na man ang maong sapa, mosuyla ang tubig og kanunay'ng maglunop ang eskena Bonifacio ug Sikatuna. Ang Parian Creek 'sab mosuyla ug makapalunop sa downtown.