Andam sa sunod katalagman
Tungod sa kalapad sa kadaot nga gibilin sa bagyong Yolanda, nag-iyahay ang mga buhatan sa gobyerno ug pribadong sektor pagpanghatag og hinabang ngadto sa mga biktima. Wa sila mag-away, ni mag-indigay, ni mag-ilogay, ni mamolitika. Wa lang sila magkasinabtanay.
Ambot tungod ba sa kahigwaos pagtabang dayon sa makaluluoy nga mga biktima, o tungod ba sa pagkaputol sa mga linya sa komunikasyon, bisan ang nagkalainlaing local government units wa maghibaw-anay kinsay nakapada og unsang hinabang sa asa nga sitio, barangay, lungsod o dakbayan nga naigo. Maong sa unang mga adlaw human sa bagyo, may mga biktima nga balikbalik nga nahatagan ug may mga biktima sang wa gyod maabti.
***
Mao say nahitabo sa pribadong mga indibiduwal, kompaniya o kahugpongan. Nasentro ang atensiyon sa ilang kaugalingong mga paningkamot. Pulos nagtinguha nga makatigom sa labing daghang hinabang aron maapud-apod sa labing daghang mga biktima sa labing daling panahon.
Kay wa may nakapahibawo nila sa kinatibuk-ang kadaot ni Yolanda sa pasiunang mga adlaw, nanghatag sila og mga hinabang sa mga dapit nga ilang naagian diin daghang biktima ang nagtapok sa kadalanan. Wa nila tuyoa nga wa dayon katungas sa bukirang mga barangay kay gawas nga wa silang katultol nahurot nang ilang mga hinabang sa patag. Maong may mga biktima daplin sa nasudnong highway nga nakatukod og mga tindahan sa bugas, delata ug noodles.
***
Nakapatumaw og laing suliran ang pag-iyahay sa matinabangon nga kahugpongan. Nangadto sila sa amihanang Sugbo ug silangang Kabisay-an nga way kasayuran pila ka pamilya ang nabiktima. Mao nga ang inosente nilang kamatinabangon nisangpot sa panagsungi sa mga biktima.
Pananglitan, nakaduaw sila sa barangay nga may 1,000 ka pamilya nga tabanganan. Apan 250 ra ka pinutos nga pagkaon ang ilang nada. Maong napugos sila og balibad sa wa mahatagi nga 750 ka pamilya. Kinsa maglisod pagsabot nganong wa sila maapod ug busa nagduda na hinuon nga gipamolitika ang mga hinabang.
***
Atubangan sa paniid sa Commission on Audit (COA) sa kayagaw sa relief operations human sa bagyong Yolanda ug ginamit ang ilang kaugalingong kasinatian sa pagtabang sa mga biktima, nisugyot ang mga tigpaminaw sa DYAB Abante Pa, Bisaya! ug mga tigtan-aw sa Maayong Buntag, Kapamilya sa mosunod nga mga paagi pagpalambo sa relief operations sa mga biktima sa katalagman:
•Paghimong daan og database sa mga molupyo sa matag sitio, barangay, lungsod ug dakbayan aron sayon rang pagsubay nila kon simbako maigo og katalagman;
•Pagsayranay sa mga buhatan sa gobyerno ug pribadong sektor aron masuhito ang mga dapit nga maigo sa katalagman ug mahatagan gyod sa labing dinaliang hinabang ang tanang mga biktima; ug
•Magsabot nga managsamang gidak-on sa pinutos nga hinabang aron kalikayan ang lalis ug sinahay sa mga biktima.
- Latest
