Pagluba sa mga sapa

 Matag bundak sa uwan mosangpot gyud sa baha sa tanang ubos nga bahin sa Metro Cebu. Kon mas kusog ang uwan, mas lapad ang baha. Kon maatol ang baha nga taob ang dagat, mas lapad nang mga dapit ang maapektahan ug kinahanglan nang pabakwiton ang labing nameligro nga mga molupyo ngadto sa mas luwas nga mga dapit.

Mopasidaan ang Pagasa matag bundak sa posibleng lapad nga pagbaha ug pagdahili sa yuta. Atol sa baha mosibaw ang reklamo sa katawhan sa kalangay sa ilang pagbiyahe, kapeligro sa ilang kinabuhi ug pagkagusbat sa ilang kabtangan. Matag human sa baha mopasalig ang gobiyerno nga sulbaron ang problema.

***

Bisan sa abundang pagarpar sa pagpalambo sa drainage system, sa paghingusog sa pagpangolekta sa basura ug paghawan sa mga sapa ug ubang agianan sa tubig, nahibawo tang tanan nga sunod nga bunok sa uwan magbaha na sab ang hapit tanang ubos nga bahin sa Metro Cebu.

Ang daotang balita mao nga sud na sa daghan uyamot nga katuigan inutil ang katawhan batok sa baha. Hangtod nga kutob ra sa istorya ang mga opisyal sa gobiyerno, manguros na lang tang daan kay segurong magbaha na sab sa sunod nga bunok sa uwan sama nga segurong mosidlak ang adlaw ugma sa buntag ug mosawop ang adlaw inigka hapon.

***

Kaniadto rang gipasanginlan ang mga politiko nga di ganahang mopalambo sa drainage system. Kay di kabutangan sa ilang ngan ug nawong ang mga imburnal nga ilubong sa yuta ug kon markahan man gyud nila way bisan usa ka botante nga maghago sa paglili.

Mas katuohan hinuon nga ang nakababag sa mga opisyal sa gobiyerno pagtinuod pagsulbad sa baha mao ang kadako sa gasto ug ang kakuti sa trabaho sa pagpalambo sa drainage system. Binilyon ka pesos ang gikinahanglan ug kinahanglang magtinabangay ang managsilingan nga mga dakbayan ug kalungsoran kay ang baha di moila og utlanan. Maong unahon nila ang mas gamay’ng gastohan ug mas yanong gimbuhaton, sama sa pagpamintal, pagdayan-dayan ug pagpanghatag og financial assistance.

***

Labing dakong tulisok angay’ng ireserba sa lokal nga mga opisyal nga nipaundayon sa hakog nga mga negosyante pagtabon sa mga kanal, pagpasimang sa naandan nga mga agianan sa tubig ug pagtukod og buildings nga nitabon ug hingpit nga nipapas sa mga sapa.

Bisan sa nagbaga nga mga pasidaan sa mga politiko, wa pay bisan usa ka malapasong negosyante nga nasilotan ni ilegal nga building nga naguba. Mas daling napalayas ang kabos nga mga molupyo sa tampi sa mga sapa. Aron pagtabon sa ilang katalawan pagpatuman sa balaud batok sa mga nakaamot sa ilang kampanya, matag human sa baha igo lang mangampanya pagpanlimpiyo sa mga kanal ug pagpangampanya pagtarung paglabay sa basura.