Problema ni Binay
May sukaranang maalarma ang mga kaatbang ni Bise Presidente Jejomar Binay. Kon ang makanunayong kataas sa iyang rating sa nasudnong surveys ang ilang tutokan. Sukad sa iyang pagsulbong sa kataposang mga semana sa kampanya sa piniliay niadtong Mayo 2010, kanus-a iyang naapsan ang nag-unang mga piliunon pagka bise presidente, Loren Legarda ug Mar Roxas, wa na gyod molingi si Binay.
Kinaham nga katin-awan sa iyang mga kaatbang sa popularidad ni Binay mao nga di siya matulisok sa mga bulilyaso sa pamunoan ni Presidente Noynoy Aquino ug way makapugong niya pagpangangkon og kredito sa maayong mga balita nga iyang gipanginlabotan. Apan napakyas sang nangaging mga kontrobersiya sa iyang pamilya pagbira niya.
***
Ang labing uwahing pasangil sa pangurakot batok sa mga Binay sa Makati di maoy una ug, samtang nagkaduol nang piniliay sa 2-16, di maoy kataposan. Una silang gitay-og dihang gisusi sa Commission on Audit ang karaang mga kaso sa pagpangawkaw sa iyang asawa nga si kanhi Makati City Mayor Elenita Binay. Dayon nahasol na sab sila sa pagkabisto sa video sa giingong pagpanghasi ni karon Makati City Mayor Junjun Binay sa mga guwardiya sa usa ka luhong subdivision.
Apan sa matag pasangil agresibong panagang ang gihimo sa mga Binay: Gipasanginlang nilang namolitika ang kadagkoan sa COA ug kusganong gipanghimakak ang pasangil sa mga guwardiya.
***
Ang nakalahi sa bag-ong kontrobersiya mao nga ang bise presidente na gyoy gipasanginlan nga nakabolsa sa kickback sa giingong overpricing sa parking building sa Makati nga gitumbok sa iyang mga kaatbang nga mas dako pa kay sa P10 bilyones nga pork barrel scandal.
Samtang nagdumili si Binay pag-atubang sa Senado, hingpit nga gubat ang gilusad sa iyang mga anak nga silang Senador Nancy Binay, Kongresista Abigail Binay ug Mayor Junjun Binay. Nagpasalipod na si Bise Presidente Binay sa Ginoo ug gihulagway sa iyang mga anak ang mga namasangil nila nga bully, bakakon ug desperado.
***
Ug gibutyag ni Bise Presidente Binay ang posibleng tinuod nga hinungdan sa ilang kabalaka sa mga implikasyon sa imbestigasyon sa Senado: Mahimong motidlom ang iyang ratings sa umaabot nga survey. Ambot nganong nahibawo si Binay sa survey nga wa pa himoa.
May sukaranan hinuon siyang mahadlok. Lab-as pa kaayong mga pasangil batok niya nga nagbansiwag sa media sa nangaging mga adlaw sa pagtubag sa respondents sa pangutana kinsay ilang pilion pagka presidente. Si Binay ang labing nasuhito sa katandugon sa sentimento sa publiko. Kay maoy iyang gikabay-an upat ka tuig ang nilabay pagkawat sa kadaogan gikan sa mas inila niyang mga kaatbang. Nahibawo sab si Binay nga usa sa labing lisod nga himuon sa politika mao ang pagpasaka pagbalik sa popularidad nga nagsugod na sa pagtidlom.
- Latest
