Buslot sa DAP

Sa mga karon pang kadungog ni Budget Secretary Butch Abad, salamat sa abunda uyamot nga mga pagsaway sa mga pundok nga nanglawgaw sa kontrobersiya sa Priority Development Assistance Fund  ug Disbursement Acceleration Program, sayon rang tuohan nga siyay labing salawayong tunglo sa bag-ong panahon kay:

• Siyay nagtudlo unsaon pagtukod og pekeng non-government organizations   aron masipong ang pork barrel sa mga senador ug mga kongresista;

• Siyay labing dako og nabolsa sa puntil sa DAP nga hasta ka-20 pil-a ang gidak-on sa P10 bilyones nga pork barrel scandal; ug

• Gawas nga palagputon sa gabinete angay pa gyong taralon sa kasong plunder aron kapahamtangan sa labing bug-at nga silot.

* * *

Una nakong nailhan si Abad dul-an sa tulo ka dekada sa wa  pang DAP:

• Isip kampeyon sa mga mag-uuma ug sa ilang katungod pagpanag-iya sa luna nga ilang gitikad isip batan-ong kongresista sa Batanes sa 1987 sa wa pa matudlong kalihim sa Department of Agrarian Reforms  ni anhing Presidente Cory Aquino; ug

• Natudlo siya pagbalik sa gabinete isip kalihim sa kanhi Department of Education, Culture and Sports  sa pamunoan ni kanhi presidente Gloria Arroyo. Siya ang responsable sa pagtangtang sa culture ug sports gikan sa DepEd aron makatingob sa pagpalambo sa sistema sa edukasyon.

* * *

 Maong nahibawo ko nga kon may takos mang mopasabot sa DAP sunod ni Presidente Noynoy Aquino kana mao si Abad. Wa ko mahibung nga maisugon siyang niatubang sa mga senador ug nibisto sa kumplitong listahan sa mga proyekto nga gigastohan sa DAP. Ang pagtambong sa hapit tanang sakop sa gabinete pagpaluyo niya nakapasemento sa talagsaong katakos ni Abad isip usa sa labing lig-ong haligi sa Malakanyang.

Wa pa siya lung-i og pangutana sa mga senador sa akong pagsuwat ini. Apan nilampos na siya pagpintal sa DAP isip yawe sa paspas nga paglambo sa nasudnong ekonomiya ug pagpadayag og kabalaka nga ang pagbasura sa DAP makagapos sa burukrasya ug makapabalik sa kalangay pagpatuman sa mga proyekto.

* * *

May mga siwil hinuong nitumaw sa testimoniya ni Abad. Nalasaw ang iyang pangangkon nga ang DAP gitumong sa labing dinaliang mga panginahanglan sa ekonomiya ug katawhan kay naapil sa iyang listahan sa mga proyekto ang kahimanan sa komunikasyon sa Presidential Security Group, stem cell research sa Department of Health ug e-Library sa Kongreso.

Nahasol sab ko sa pagbalikbalik ni Abad sa grabeng kalangay sa mga proyekto sa wa pang DAP. Kinsa may nag-umol sa mga proyekto? Kinsa may nagtudlo sa nabulilyaso nga mga sakop sa gabinete? Di kaha maayo nga inay paugatan nila ang DAP manudlo na lang ang Malakanyang og mas takos nga gabinete ug maagpasiugda og mas mapuslanong mga proyekto?