Video karera duol sa brgy hall

Ang maayo nga buhaton sa mga drayber og public utility vehicles, sama sa passenger jeepneys ug bus, nga wala makagusto sa pagpausbaw sa kantidad sa multa kun sila madakpan mao ang pag-kwestyonon didto sa hukmanan ug dili kay mag-welga.

Sayop kaayo nga sakripisyohon ninyo ang mga sumasakay kay anaa kamo kanila nabuhi. Pastilan, kun ang mga tawo susama pa nako og huna-huna nga dili na mosakay og PUJ tungod sa kalagot sa inyo'ng pagsakripisyo kanila, sigurado nga makulban mo'g "kaldero."

Bisan og usa ka semana lang nga moundang ang mga tawo pagsakay og PUJ's, paminaw ko daghan na nga drayber ang magbasol sa pagsalmot sa transport strike.

Binuang man gud ang sagad himuon sa mga drayber. Sa buntag pa hakoton nila ang mga pasahero gikan sa lainlaing dapit paingon sa tagsa-tagsa nila ka trabahoan, apan inigka-hapon dili na sila mobiyahe. Unsay mahitabo?

Kun wala kamo makagusto sa gipatuman nga usbaw sa multahan nga gimando sa Department of Transportation and Communication ang inyo'ng buhaton mao ang pagpadala og suwat aron iladlad ang inyong protesta.

Pananglit dili sila maminaw kaninyo, dangop sa hukmanan aron nga pugngan ang pagpatuman sa Joint Administrative Order 2014-01 nga naglatid og dagko kaayo nga multa.

Para gud nako nga matinumanon kaayo sa balaod sa pagmaneho og sakyanan, dili gayud ko mahadlok nga dagko ang multa. Hinuon, bisan ako nakaingon nga dagko na g'yud kaayo apan kinahanglan ba gayud nga magwelga?

Madakpan ba gud ang usa ka drayber kun magtuman lang gayud siya sa tukma nga lagda sa pagmaneho? Imposible nga madakpan. Dili ba kamo mangutana kun nadakpan ba ko sa 27 ka tuig nako nga pagmaneho og sakyanan?

Kun magtuman ka lang sa tukma nga lagda sa pagmaneho'g sakyanan, gawas nga dili ka madakpan layo pa gayud sa aksidente, aw tingali kun ikaw na ang tuyuon sa pagbangga.

Busa awhag nako kaninyo'ng mga PUV drayber, undang na kamo niana'ng paghimo og welga. Ingna ang inyo'ng mga lider nga ipaagi ninyo sa legal nga lakang ang pagkwestyon sa pagpausbaw sa multahan.

* * *

Nakadawat ko'g text message gikan sa usa ka lumulopyo sa Barangay Pahina San Nicolas nga nagtug-an kanako nga adunay nag-operate og duha ka video karera duol g'yud sa barangay hall.

Hala, ngano kaha nga wala man makahimo'g aksyon niini si Kapitan Antonio Caruzca? Base sa inpormasyon, usa ka Cynthia ang nag-operate niini'ng mao nga mga video karera.

Imposible bitaw no nga wala masayod niini ang kapitan ug ubang opisyal kay duol man diay kaha sa barangay hall ang mao nga balay? Ang akong inpormer wala g'yud modayeg sa ilang mga opisyal kay walay gihimo.

Nakabasa man gud sila sa akong lindog nga naghisgot sa mga tanod sa Mabolo nga misakmit og mga video karera. Daygon nako si Kapitan Rey Ompoc sa Mabolo kay gipangsakmit nila ang mga karera sa ilang dapit.

Siyaro ka na man 'sab Capt. Tony kun wala ka masayod niana'ng duha ka video karera nga gi-operate duol sa kapilya? Ang akong inpormer mitug-an nga kusogan kaayo ang mao nga video karera kay sa unahan anaa ang suyopanan og shabu.

Pastilan. Kun tinuod man gani kini, unsa man diay ang trabaho ni Kapitan Caruzca? Kutob lang sa pagpamirma og dokumento nga walay pagpakabana sa iyang palibot?

Ang akong inpormer mitaho usab nga sa usa ka semana halos makatulo ka higayon nga adunay tigbakay nga ipahigayon diha sa unahan ra usab sa barangay hall. Ang nakapaet kay konsehal kuno ang nagpasiugda.

Higayon na tingali kini sa hepe sa kapolisan diha sa Presento 6 nga nagbase sa Sawang Calero nga molihok na. Atensyon, Senior Superintendent Noli Romana, Sir, palihoka na ang imong mga polis aron walay magduda nga imo lang gipasagdan ang ilegal nga sugal.

Daghan kaayo og gireport ang akong inpormer, naapil pa ang tighabwa og pansayan nga posible nga maoy hinungdan sa gireklamo nga baho diha sa sapa. Apan unya na ang uban.