Pagpapas sa DAP ug PDAF

Sunudsunod nga gibaraw sa Korte Suprema ang Kongreso ug ang Malakanyang sa di paglapas sa ilang gahom ug sa di pagpangangkon sa di ilang mga gimbuhaton. Sa duha ka makapakugang nga desisyon, gibasura sa labawng hukmanan nga ilegal ug unconstitutional ang Priority Development Assistance Fund sa mga senador ug mga kongresista niadtong Nobyembre 2013 ug ang Disbursement Acceleration Program sa Malakanyang sa pagtapos sa niaging buwan.

Way bisan gamayng luna sa kalibog sa baruganan sa Korte Suprema sa duha ka kontrobersiya: 14-0 ang botasyon sa mga mahistrado batok sa PDAF ug 13-0 ang ilang botasyon batok sa DAP.

* * *

Masuk-anong mga protesta ug lapad nga pagkagusbat sa linog ug bagyo ang gisundan sa pagsalikway sa PDAF. Maong way ek ang mga senador ug mga kongresista. Naglumba pa gani pagpasalig ug pagpasaka og mga balaodnon sa hingpit nga pagpapas sa pork barrel.

Di sama kalapad ang mga protesta batok sa DAP. Di lang tungod sa popularidad ni Presidente Noynoy Aquino, nga nipasalig nga nakapalambo sa nasudnong ekonomiya ang DAP kay mas paspas nang napatuman ang mga proyekto, wa pay nitumawng mga ebidensiya sa pagpangawkaw, gawas sa pasangil ni Benhur Luy nga nitugpa sa pekeng NGOs ni Janet Lim Napoles ang DAP sa lima ka senador--Bong Revilla, Jinggoy Estrada, Juan Ponce Enrile, Bongbong Marcos ug Tito Sotto.

* * *

Apan di angayng makugang ang Malakanyang sa gidangatan sa DAP. Kay ang mga protesta batok sa PDAF nanaway nang daan sa mas dakong pork barrel ni Presidente Aquino. Bisan ang hukom sa Korte Suprema batok sa PDAF nitataw nga angayng idili ang lump-sum allocations (tiningob nga gahin) nga gipahimuslan sa Kongreso ug Malakanyang pagpanghilabot sa mga gimbuhaton nga di ila:

•Di angayng manghilabot ang mga senador ug mga kongresista pagpatuman sa mga proyekto human sa ilang pag-aprobar sa nasudnong gahin (General     Appropriations Act); ug

•Di angayng gastuhon sa Malakanyang ang kuwarta lapas sa gimbut-an sa Kongreso pinaagi sa pagpasimang sa pundo ngadto sa di nila mga sakop (mga senador ug mga kongresista) ug mga proyektong wa maapil sa General Appropriations Act.

* * *

Nagtinguha si Presidente Aquino pagpalig-on sa mga institusyon sa nasud aron nga ang tanang makiangayong kausaban nga nasugdan sa iyang pamunoan magpadayon bisan kinsay mopuli niya sa 2016. Ang pagbasura sa Korte Suprema sa PDAF ug DAP maoy pagdason di pagsukwahi sa paghimong mas malungtaron sa mga bunga sa paningkamot ni Aquino paghimong mas ligdong sa gobyerno.

Inay mosukol angayng mohangop ang Malakanyang sa pagpapas sa PDAF ug DAP. Aron di na mag-apil-apil ang Kongreso pagpatuman sa mga proyekto, nga iya sa Malakanyang, ug di manghilabot ang Malakanyang paggahin sa nasudnong panudlanan, nga iya sa Kongreso, bisan unsa kabadlungon ang mopuli nila.

* * *

Email: [email protected]