Mas daghang natabangan

 Cebu Technological University, Cebu City -- Mas daghan ang nangalagad ug mas daghan ang natabangan sa Grand Halad sa Kapamilya dinhi karong buwana. Salamat sa talagsaong pasundayag sa kamanggihatagon ug pagtinabangay sa mga Sugbuanon, napamatud-an sa makausa pa nga ang Grand Halad maoy labing dakong piyesta sa libreng mga pangalagad sa Sugbo ug Kabisay-an.

Di mahitsura ang Grand Halad sa Kapamilya sa usa lang ka tawo, o kompaniya, o institusyon, o buhatan sa gobyerno. Gikinahanglan ang hingpit nga pagtampohay sa katigayonan, katakos ug panahon aron pagtapok sa tanang nahilambigit ning higanteng kalihokan. Kami sa DYAB Abante Pa, Bisaya! ug ABS-CBN Cebu nahimo lang taytayan sa mga may kasingkasing sa pagtabang ug sa labing nagkinahanglan og tabang.

***

Mao na ni ikasiyam nga tuig sa pagpahigayon namo sa Grand Halad. Kay kaduha man matag tuig, mao na ni ang ika-17 nga Grand Halad sukad sa 2005. Matag pangandam namo sa Grand Halad sagolan gyod gihapon og kabalaka nga pul-an na og tampo ang mga tawo ug kahugpongan ug mga buhatan sa gobyerno nga among dapiton ug kami ray magmingaw nga maghilas-hilas pagpasiugda sa piyesta sa mga pangalagad.

Apan matag higayon mapapas ang among kabalaka sa init nga pagsanong pagtabang sa labing kabos, labing masakiton, labing gipanggutom ug labing napasagdan natong mga Kapamilya.

***

Mas hapsay ang Grand Halad karong buwana kay gipalinya na namong daan ang mga pasyente sa nagkalainlaing mga pangalagad nga ganahan nilang mapahimuslan. Lahi sa nangaging mga higayon nga gitapok una namo sila sa usa lang ka dapit alang sa pormal nga pagbukas sa kalihokan.

Pagsugod sa among mga pangalagad sa alas-6 sa buntag, kapin na sa libo ka pasyente ang nalinya alang sa libreng mga tambal ug paghiling sa mga doktor, 500 na ang naglinya alang sa dental services ug 400 na ang naglinya alang sa optical services. Way labot sa mga naglinya nang daan alang sa libreng feeding, seminars, konsulta ug notaryo sa mga abogado ug one-stop shop sa mga pangalagad sa gobyerno.

***

Daghang salamat sa Cebu Technological University, ubos sa liderato nilang CTU president, Dr. Victor Villaganas, ug Extension Services Head, Dr. Greg Gamboa, ug mga magtutudlo ug mga tinun-an sa pagpaggamit sa tibuok nilang tulo ka ektarya nga luna alang sa Grand Halad.

Dako ang kahigayonan nga sa CTU gihapon mapahigayon ang sunod nga Grand Halad sa Nobyembre. Kanus-a saulugon sab sa eskuylahan ang sumad sa ilang pagka unibersidad. Hinaot nga bisan mabalaka na sab mi sa pagpangandam sa sunod nga Grand Halad mas daghan lang gihapon ang mosanong sa pagtampo sa ilang katigayonan, katakos ug panahon alang sa mas nagkinahanglan nga mga Sugbuanon ug mga molupyo sa kasilinganang mga lalawigan.

***

Email: [email protected]