Atong sapa, atong ugma

Sa kadako sa suliran sa mga sapa sa Metro Cebu, maglisod pagpangita asa sugod si bisan kinsang mangahas pagpasiugda og kalihokan pagluwas sa mga kinabuhi ug kabtangan gikan sa baha ug sa kalikopan gikan sa sakit ug kahugaw. Mga nakasuway na pagsugod pagluwas sa himatyon na nga mga sapa mokumpisal nimo sa ka way kapuslanan kon mag-iyahay ug sa kalisod sa paglahutay.

Apan wa ning kapugong sa mga buhatan sa gobyerno ug pribadong sektor sa pagpadayon pagduso og mas malungtaron nga programa pagbanhaw sa mga sapa. Bisan ang kakuwang og pasiunang kalamposan sa kampanya wa makapawong sa ilang determinasyon pag-usab sa usa sa labing laksot nga hulagway sa pagkagusbat sa kinaiyahan.

***

Usa sa wa motalaw sa dakong hagit pagluwas sa mga sapa mao ang Cebu Chamber of Commerce and Industry. Nga mopasiugda sa ikaduhang sunudsunod nga tuig sa "Cebu Run for the Rivers" karong Dominggo, Hunyo 22. Kaliboan ka Sugbuanon ang gipaabot nga managan sa lumba nga magsugod ug matapos sa SM City Cebu Northwing Parking Area.

Makahuloganon ang tema sa pinalapdang kampanya sa CCCI pagbuhi sa mga sapa, "Atong Sapa, Atong Ugma." Ang matigom sa bayranan sa rehistrasyon gamiton paglimpiyo ug pagpananom og mga punoan sa kahoy ug kawayan sa sapa sa Mahiga nga nagtabas sa utlanan sa mga dakbayan sa Sugbo ug Mandaue.

***

Si Dennis Wong, pangu sa "Cebu Run for the Rivers," masaligon nga mas daghan ang managan karong tuiga kon itandi sa una nilang lumba sa niaging tuig tungod sa ilang pagpakitabang sa mga eskuylahan nga may mga tinun-an sa National Service Training Program, nga maoy gihulip sa di na compulsory nga Reserved Officers Training Corps.

Nanghinaot sab si Wong nga mas lapad na ang ilang kasinatian sa pakiglambigit sa mas daghang buhatan sa gobyerno, pribadong mga kompaniya ug ubang kahugpongan aron mas lapad ug mas malahutayon nang ilang proyekto pagpalambo sa Mahiga ug ubang mga sapa.

***

Kon ganahan ka nga gawas nga makapa-ugnat sa kusog pinaagi sa pagdagan, makatabang pa gyod sa pagluwas sa atong mga sapa sa Sugbo, gipahibawo ni Wong nga magpadayon pa ang rehistrasyon karong semanaha sa "Cebu Run for the Rivers" sa mosunod nga registration centers: CCCI sa North Reclamation Area sa Dakbayan sa Sugbo, Cebu City Sports Center, International Pharmaceuticals Inc., Runnr sa Ayala Center Cebu, Toby's sa SM City Cebu ug Casa Ilongga sa Robinson's Place.

Makapili ka ning mosunod nga mga kategoriya sa lumba ug bayranan sa rehistrasyon: 3 kilometers-P100 (race bib ra), P250 (shirt ug bib); 5 kilometers-P250 (shirt ug bib); 10 kilometers-P350 (shirt ug bib); ug 21 kilometers-P500 (shirt ug bib).

***

Email: [email protected].