USC ug Maternity
May duha ka dagkong kontrobersiya sa Dakbayan sa Sugbo nga nipakita sa mga Sugbuanon sa managlahi nga sangpotanan tungod sa managlahi nga mga paagi sa pagduma: Ang niulbo nga panagsungi sa pamuo sa University of San Carlo sa Talamban; ug ang nag-una nga pasangil sa pagtaptap og tape sa bata nga pasyente sa Cebu Puericulture Center and Maternity House.
Sa kaso sa USC, nitudlo dayon ang kaparian og tigpamaba nga niatubang dayon sa media ug nipasabot sa ilang bahin sa kontrobersiya. Apan sa kaso sa Maternity Hospital, way ganahang mopakita, gawas sa ilang abogado nga kuwang na lag diyutay nga motulisok sa masuso nga maoy niunay pagtaptap sa iyang baba.
***
Sa akong pagsuwat ini, wa pa mahusay ang panagsungi sa USC. Apan nalibkas na ang barikada sa mga ganghaan sa ilang Talamban Campus ug nakabalik nang klase ug nakapadayon nang enrolment ug ubang naandang kalihokan.
Mahimong nakumbinser ang nagprotesta nga mga kawani paghunong sa ilang barikada tungod sa sayo ug tin-aw nga pagpasabot ni kanhi USC President Fr. Ernesto Lagura nga kinahanglan silang manaktak tungod sa gipaabot nga dakong pagtidlom sa kita sa pagpatuman sa K-12, nga gibayran og labaw sa gitakda sa balaud ang nataktak nga mga kawani ug nga andam silang makigsabutabot pag-usab aron mahusay ang nahibiling panagsungi.
***
Kun sama sa taga Maternity Hospital nanago pa ang kaparian sa USC, nagdumili paghatag og bisan unsang katin-awan sa kontrobersiya, gawas sa pag-ingon nga ila pang gisusi sa way pagtagad pagpahibawo unsay resulta, o ba kaha pagpatingog og torotot nga mamasangil sa mga welgista nga maoy nagtaktak sa ilang kaugalingon, kadako na kaha sa kaguliyang sa Talamban karon.
Wa mamatay ang bata nga pasyente. Mas dako ang kaso sa USC kay kapin sa gatos ka kawani ang ilang gitaktak. Apan ang mas dakong kaso mahimong mas dali nga mahusay kay napasabot man dayon. Ang gamay unta kaayong problema sa Maternity Hospital mahimong mosangko sa hawanan sa Senado.
***
Kun dasonan sa mga senador ang resolusyon ni Senador Nancy Binay pag-imbestigar sa gidangatan sa batang pasyente sa Maternity Hospital, kaluoy sa kadagkoan sa tambalanan. Mas maayo pa untang nanubag dayon sa mga pangutana sa lokal nga media. Way garantiya nga makabuka sa ilang baba kun insultuhon ug pakauwawan na sila sa mga senador. Kun mangahas pagsal-ot ang ilang abogado, posibleng mas unang mapriso kay sa nurse nga ilang gitabonan.
Angay’ng mangaliya ang kadagkoan sa Maternity Hospital nga mahigot ang mga senador sa pagsusi sa listahan nilang Janet Lim-Napoles ug Benhur Luy. Ug nga di kakita ang mga pasyente sa Sugbo og laing kadangpan nga makaseguro sila’ng di binuangan ang ilang mga bata samtang way laing nagtan-aw.
***
Email: [email protected]
- Latest
