Ang "towing" makadisiplina g'yud

Pwerte'ng nakayawyaw sa akong amigo nga Kapitan sa Barangay San Roque dinhi sa dakbayan sa Sugbo tungod sa daghang mga tag-iya og sakyanan nga mihimo sa daplin sa karsada nga ila'ng grahe.

Ang angay'ng himoon ni Kapitan Lediore "Boy" Miranda ug sa ubang mga kapitan nga kumbinsihon ninyo si Mayor Michael Rama nga ibalik g'yud ang "towing operations" sa mga sakyanan nga ipataka lang sa pag-parking sa daplin sa karsada ug sa mga aseras.

Unsaon nga dili man ganahan si Mayor Rama sa mao nga kalihukan. Samtang gibutyag sa mayor nga wala niya gipahunong ang towing, apan wala na niya ipa-renew ang kontrata ngadto sa mga private towing companies.

Kun wala man magustohi ni Mayor Rama ang pagbahinay sa bayad nga makolekta gikan sa masakpan'g motorista nga magpataka lang pag-parking sa ilang sakyanan, mahimo'ng iya'ng ipausab kun natan-aw niya nga alkanse ang dakbayan.

Pananglit wala makagusto ang mayor sa towing company, kay ang usa gihulagway man nga gidumala sa suod kaniadto ni kanhi Kongresista Tomas Osmeña, mangita siya'g lain nga towing company.

Ang City Traffic Operations Management adunay towing truck, apan wala man 'sab maglihok. Mao kana nga nagkadaghan ang mga sakyanan nga giparking bisan ug adunay traffic sign nga ang pag-parking gidili sa tanang higayon.

Tinuod, ang usa ka tow truck dili makasapar sa daghan kaayo nga nag-ilegal parking. Apan mas maayo na lang nga makakita ang mga motorista nga adunay mangguroy kay aron sila mahadlok sa pagpataka og parking.

Para kanako, ang towing operations mao gayud ang makapahadlok sa mga motorista nga dili sila magpataka og parking. Unsaon, naminaw man si Mayor Rama sa iyang alalay nga si Tinago Kapitan Joel Garganera.

Pareho niini'ng usa ka school van (GXJ 634) nga kanunay gayud nga anaa giparking sa aseras atubangan sa usa ka balay patigayon nga nahimutang kilid sa karaan nga Sacred Heart for Boys sa General Maxilom Avenue.

Diha sa dalan Sikatuna atubangan niana'ng nagnegosyo og mga puthaw, kanunay lang nga adunay mag-parking nga makahasol sa sakyanan nga mangagi.

Sa eskena Bonifacio ug Sikatuna, adunay gitukod nga kabahin sa tindahan nga giabot g'yud sa aseras. Unya kanunay usab nga aduna'y traysikol nga mag-parking.

Ambot, ngano kaha nga ang mga kawani sa kagamhanan nga gitugyanan niini mora'g nahadlok man sa pag-aksyon. Sama nga nahadlok sila sa paghimo'g aksyon sa mga naninda nga anaa na sa karsada kilid sa Santo Niño Barangay Hall.

* * *

Magpasalamat ko ni CITOM Executive Officer Rafael Christopher Yap ug ni Joy Tumulak, ang operations chief sa CITOM, nga gisigihan nila'g destino og patrol car ang atubangan sa usa ka wine shop diha sa Gorordo Avenue unahan sa Lahug Elementary School aron mabadlong ang mga abusado nga anha mo-parking sa karsada.

Masabot man gud nga kun dili mohimo og aksyon ang CITOM sa abuso sa mao nga mga motorista nga naglumbay ang mga sakyanan nga gi-parking sa karsada, basin og gadawat ang pipila ka opisyal sa CITOM aron paboran ang balay-patigayon.

Ang mga sakyanan adto nila ibutang sa parking space sa balay-patigayon, dili kay anha diha sa karsada nga mag-atbang pa gani. Usahay maglisod pag-agi ang mga moagi nga sakyanan kay ang uban mohunong nga mag-double park, kay mangita og asa kini maka-parking.

Maayo gani kay giaksyonan ni Sir Raffy ug Sir Joy ang reklamo sa mga motorista nga sagad mag-agian diha sa Gorordo Avenue panahon sa gabii.