Bag-ong mga magtutudlo

Mga 3,425 ka bag-ong magtutudlo ang kuhaon sa Department of Education (DepEd) alang sa Sugbo, Bohol, Negros Oriental ug Siquijor alang sa umaabot nga tuig tingtungha, 2014-2015: 1,404 nila alang sa kindergarten ug Grade 1 hangtod sa Grade 6; samtang 2,021 alang sa Grade 7 ug Grade 8 ug Year 3 ug Year 4 sa Junior High School.

Kabahin sila sa 31,335 ka bag-ong magtutudlo nga kuhaon sa DepEd alang sa tibuok nasud. Giluwatan na sa Department of Budget and Management (DBM) ang P9.5 bilyones nga gahin niadto pang Enero ning tuiga. Aron may igong panahon ang DepEd pagkuha sa tanang bag-ong mga magtutudlo karong Abril 1.

***

Maayo ning balita alang sa mga nakapasar sa Licensure Examination for Teachers (LET) sa Professional Regulation Commission (PRC). Maibanan na ang mga gradwado sa edukasyon nga nagpatid-patid pa og lata o napugos pagsud sa mga trabaho nga di haom sa ilang kurso.

Hinaot nga ang labing takos nila maoy makuha. Hinaot nga mapapas na ang nangalisbo nga raket sa kurakot nga mga opisyal sa DepEd nga mangilkil og kuwarta sa mga aplikante. Ang mga manuburno bisan di takos maoy ibutang sa dagkong mga eskuylahan sa patag. Ang mga maisugon nga magdumili pagdugo, bisan unsa pa katakos, mao intawoy ilabay sa bukirang mga barangay.

***

Salig ko sa kaligdong nilang Education Secretary Armin Luistro, DepEd 7 Regional Director Carmelita Dolangon ug ubang tagduma sa DepEd. Apan ang ilang presensiya di garantiya nga mabadlong na sa mga ubos nila nga nahigam na sa pagpahimus ug pagpaburot sa ilang katungdanan.

Dako og ikatabang kon ang mga aplikante mismo mobarug batok sa kahiwian sa pagpanguha sa bag-ong mga magtutudlo. Gawas sa pagdumili sa pagbayad, kinahanglan sila nga mobisto sa mga detalye giunsa pagmaniobra ang proseso, giunsa paglisudlisod ang mga nagtinarung pagsumiter sa tanang gikinahanglan nga dokumento ug giunsa pagpalusot ang di takos apan nanuburno nga mga aplikante.

***

Nanghinaot si Budget Secretary Butch Abad nga katapakan na ang nahibilin nga 33,194 nga kakuwang sa mga magtutudlo karong 2015, usa ka tuig sa di pa mapupos ang termino ni Presidente Noynoy Aquino. Edukasyon maoy labing epektibong kahimanan paghaw-as sa mga kabos ug pag-andam nila sa umaabot nga mga panrabaho. Masaligon si Abad nga makatampo sa pagpalambo sa kalidad sa edukasyon ang pagdugang sa mga magtutudlo nga mosangpot sa pag-iban sa gidaghanon sa mga tinun-an sa matag classroom:

•25 ngadto sa 35 ka tinun-an sa kidergarten sa matag classroom ug matag magtutudlo; ug

•45 ngadto sa 55 ka tinun-an sa Elementary Level Grade 1 ngadto sa Grade 8 ug Secondary Level Years 3 ug 4 sa matag classroom ug matag magtutudlo.

***

Email: [email protected].