Mga sakyanan walay plaka

Kaabtik gyud bitaw sa atong mga opisyal sa kagamhanan nga mohimo'g mga kasaulogan sa makasaysayanong adlaw sa nasud aron kunohay dili mahikalimtan sa katawhan.

Apan daghan kaayo sa kabatan-onan karon wala gyud makatugkad kun ngano nga gideklarar nga "holiday" kining maong mga adlaw.

Dunay mga bata nga akong gipangutana kabahin sa pagsaulog karong adlawa sa EDSA People Power revolution ug wala sila makahatag og tukma nga tubag.

Ang EDSA People Power revolution nahimo 28 lang gani ka tuig ang nakalabay apan daghan na sa kabataan ang wala na masayod sa mao nga panghitabo. Unsa pa kaha kadtong mga hitabo nga dugay na kaayo.

Laing grupo sa mga bata nga nagtungha sa Grade V, ako nga gipangutana kun nahibalo ba sila sa kinabuhi ni Dr. Jose Rizal nga maoy giila nato nga bayani, apan wala 'sab sila masayod.

Pastilan kun ingon niini ang magdaghan, anugon lang ang pagsaulog nato sa makasaysayanong mga adlaw nga moabot ang panahon nga ang mga tawo malipay kay walay trabaho ug walay klase, apan wala sila makasabot.

Nasayod sila nga si Rizal atong nasudnong bayani apan wala sila masayod sa mithi ni Rizal. Ibutang nato nga tinuod ang pagtuo nga adunay pagkuwang sa pagtudlo diha sa mga tunghaan kabahin sa history, apan kitang mga ginikanan tingali angay nga motabang pagtudlo sa atong mga anak.

Suginlan nato ang atong mga anak sa makasaysayanong mga adlaw, sama kun ngano nga ang kasaulogan karong adlawa gihinganlan man og EDSA People Power revolution.

Gawas nga malingaw sila nga masayod sa kasaysayan sa mao nga adlaw, masilsil pa sa dabong nila nga kaisipan ang kaagi sa mga inilang tawo kaniadto sa nasud ug makatabang pa kanila sa ilang leksiyon didto sa tunghaan.        

* * *

Nakapanglingo-lingo ko nga nagsud-ong sa daghang mga armas, mga nindot ra ba ang uban, nga nasakmit sa kapolisan gikan sa tago-anan sa giingon nga banggiitang kriminal sa Barangay Tejero.

Dugay na ko nga nakadungog nga ang maong grupo nalambigit sa negosyo sa pagpamaligya og drugas ug sa mga pagpamusil diha sa mao nga barangay. Apan wala lang ko magtagad kay siyaro 'sab og wala masayod niini ang mga opisyal sa barangay.

Apan adunay mitug-an kanako nga ang mga opisyal sa Barangay Tejero nakig-coordinate na man diay sa kapolisan ug gitug-anan na nila ang ilegal nga kalihukan sa mao na grupo apan dugay kuno kaayo nga nahimoan og aksiyon sa mga awtoridad.

Unya, ang nahibudngan pa gayod sa mga opisyal sa barangay mao nga sa pagronda wala diha ug makaikyas man ang giila nga lider? Buyno, ang kapolisan ra'y nasayod niini kun tinuod ba ang pagduda sa pipila ka opisyal sa Tejero.

* * *

Awhagon nako ang kadagkoan sa kapolisan, ilabi na ang City Traffic Operations Management (CITOM), PNP Traffic Group nga maghimo unta sila og pundok nga modakop niining mga motorista kang kansang mga sakyanan walay plate numbers.

Kun duna may mga plate numbers, gipangtaptapan og itom nga bildo o plastik nga dili gyud mabasa ang sulod. Nakasaway gyud ko sa mga tinugyanan sa balaod nga wala lang magtagad kabahin niini.

Tan-awa, gipatay si Atty. Noel Archival unya wala mahibaw-i. May plate numbers pa gani ang gisakyan sa namanhig kanila. Unsa, maghuwat pa ba kamo nga moabot ang higayon nga adunay mamusil nga magsakay og motorsiklo nga walay plaka usa kamo mohimo'g kampanya?

Nakabantay man gud ko nga daghan na kaayo ang mga motorsiklo nga gipangtagoan ang mga plate numbers. Unsaon, wala na may ahensya sa kagamhanan nga manakop sa mao nga mga drayber.

Ang mga organic personnel sa Land Transportation Office (LTO) wala na man ko makabantay nga naghimo og checkpoint operations. Ang Task Force Alpha (TFA) wala pa usab hatagi pagbalik ug "go signal" nga makapadayon sa pagtabang sa LTO.

Kini maoy rason nga misiaw ang mga badlongong draybers sa pagkakaron. Awhag nako ni Senior Superintendent Noli Romana nga isip labaw'ng opisyal sa Cebu City Police Office (CCPO) himoi og aksyon kining maong binuang sir, ug ayaw pasayloa bisan ug ang naghimo niini ang uban mga polis.