Hilabti ayaw ang lisensiya
Human nipahinumdom ang kadagkoan sa Land Transportation Office (LTO) sa Sugbo ug Central Visayas nga way si bisan kinsa nga makakuha sa mga lisensiya sa mga drayber gawas sa ilang deputized agents, mas gipahugtan pa sa pipila ka subdivisions ug mga kompaniya ang ilang giisip nga lehitimo nga mga lagda sa seguridad.
Sugod sa niaging semana, usa sa labing inilang subdivision sa Dakbayan sa Sugbo nanguha na sa mga lisensiya sa mga drayber di lang sa mga taxi kon dili apil na sa pribadong mga sakyanan. Ambot kon lagda ba sa homeowners association o paukyab ba lang sa ilang security agency, dakong kalapasan sa balaod ang ilang gihimo.
***
Di ta moadto og layo. Magsugod ta sa balaod nga nalapas sa mga kompaniya ug subdivisions nga gipakaingon nila nga ordinaryong piraso sa papel o plastik ang mga lisensiya sa mga drayber nga mahimo nilang kuhaon bisan unsang orasa:
• Bisan wa silay kawani ni guwardiya nga nabansay-bansay ni na-deputize sa LTO; ug
• Bisan way nalapas nga bisan unsang lagda sa trapiko sa mga drayber sa mga sakyanang pribado ug pamasahero nga igo lang nisud sa ilang mga ganghaan.
Ang balaod nga ilang nalapas mao ang Republic Act (R.A.) 4136, nga napasar sa Kongreso niadtong 1964 pagtukod sa LTO aron pagduma sa kadalanan ug paghatag og lisensiya ni bisan kinsa nga gustong momaneho og sakyanan.
***
Mao ni ang mga probisyon sa R.A. 4136 nga angayng basahon ug sabton sa mga tagduma sa mga kompaniya ug subdivisions ug sa ilang security agencies:
• Section 19: Tanang drayber kinahanglan nga magda ilang lisensiya sa tanang higayon sa ilang pagmaneho og mga sakyanan;
• Section 56: Makahimo og krimen si bisan kinsa nga momaneho og sakyanan nga wa magda og driver's license;
• Section 29: Makuha lang sa LTO ug sa iyang deputized agents ang lisensiya sa drayber kon nakalapas og lagda sa trapiko; ug
• Section 62: Way ahensiya sa gobyerno o pribadong kompaniya o subdivision nga makapatuman og mga lagda nga mosukwahi sa R.A. 4136.
***
Mahimong mangugat ang mga tagduma sa mga kompaniya ug subsidivisions ug bisan local government units ug ang ilang security agencies ug traffic enforcers nga duna silay gahom pagpatuman ug mga lagda alang sa kahapsay ug seguridad sud sa pribado nilang kabtangan o hurisdiksiyon.
Way lalis sa ilang gahom. Apan di sila mahimong mag-umol og mga lagda nga mosukwahi sa R.A. 4136, sama sa pagkuha sa mga lisensiya sa mga drayber. Lehitimo ang ilang tinguha nga makaila sa tanang drayber sa mga sakyanan nga mosud sa ilang kabtangan o hurisdiksiyon. Nga mahimo pinaagi sa pagkuha og identification cards sa gobyerno, sa way paghilabot sa driver's license.
***
Email: [email protected]
- Latest