Tamla ug budol

ABS-CBN Complex, Jagobiao, Mandaue City — Naglingiting pang kainit sa adlaw sa pagsugod namo og tamla sa among mga pad sa higanteng puti nga canvass nga among pabarugon isip billboard. Aron pagrepresentar sa mga kamot nga nakatampo sa pagpabarug sa mga biktima sa linog sa Bohol ug sa bagyong Yolanda sa amihanang Sugbo ug silangang Kabisay-an.

Gatosan ka donors ug volunteers sa Kapamilya Relief Campaign ang nakahigayon pagkuyog namo dinhi bisan sa mas madanihon nga kabig sa ilang dates sa Valentine's Day. Daghang salamat nga upat ka buwan human sa katalagman wa pa gihapon mapawong ang ilang pagpakabana alang sa labing nagkinahanglan nga mga biktima.

***

Labing unang nangabot dinhi ang kadagkoan sa mga sanga sa Armed Forces of the Philippines (AFP) nga naglakip sa Philippine Army (PA), Philippine Navy (PN) ug Philippine Air Force (PAF). Nikuyog sab namo ang labing dagkong mga opisyal sa Philippine National Police (PNP). Niapil ang kadagkoan sa local government units (LGUs), pribadong mga kompaniya ug kahugpongan nga way kakapoy nga nitabang sa pagpamutos ug paghakot ug pag-apud-apod sa mga hinabang sa manggihatagon nga mga Sugbuanon.

Way ngan ang tamla sa mga pad. Managsama ang gidak-on ug gibag-on sa tamla bisan unsa kataas sa katungdanan o kakabos sa kahimtang sa katilingban. Pagmatuod nga di ang gidak-on sa hinabang kun dili ang pagtunol sa kabahin sa ilang kabtangan ug paggahin sa ilang panahon pagtabang sa mga biktima sa katalagman.

***

Naglisod pag-abot dinhi ang among mga dinapit. Tungod sa pagkabara sa mga sakyanan dayong sugod sa parada ug Sarok Festival sa founding anniversary sa silingang lungsod sa Consolacion. Apan nangabot gyod sila ug nakaapil sa kalihokan.

Nakatampo hinuon mi og diyutay sa trapiko sa Cebu North Road tungod sa among sibyaanan. Kay ang mga sakyanan sa among mga dinapit wa na kasud sa complex tungod sa among giladlad nga gatosan ka lamesa nga puno sa mga pagkaon nga bawon sa mga nanambong.

***

Nanagana mi apan napatuman gyod ang sabot nga way platohay, way kutsarahay ug way tinidoray ang nisunod namong Budol fight. Human nitamla sa ilang pad, nanghunaw dayon ug nangandam sa dakong kumbira. Nangalimyon ang kahumot sa hinawob nga mga dahon sa saging nga gihapin sa mga lamesa ug ang nagkalainlaing putahe nga giandam sa Bantay Bata 163 ug mga dinapit.

Sa wa pa magbuwagbuwag gihangyo ang among kaubanan nga mangatug og sayo kay mangadlawon pa mi pagbiyahe paingon sa Paypay Elementary School sa Daanbantayan, amihanang Sugbo. Mamanday, mamintal ug manambal ang mga boluntaryo nga mokuyog sa Kapamilya Rehabilitation Caravan. Nga sinugdanan lang sa mas lapad nga tampo ug mas malahutayon nga pagtabang sa pagbangon sa makaluluoy nga mga biktima sa amihanang Sugbo ug silangang Kabisay-an.

***

Email: [email protected]