Midaghan ang mga abusado

Tan-aw nako nagkadaghan ang mga drayber nga wala na motuman sa balaud sa tukma nga pagmaneho og mga sakyanan.

Wala na usab kaayo ko makakita og mga sakop sa Land Transportation Office nga nagpahigayon og checkpoint operation niining milabay nga mga buwan.

Ambot kaha kun unsay bation ni LTO Acting Regional Director Arnel Tancinco kun makakita og mga sakyanan nga ang mga drayber maisip nga abusado. Makaako ra ba kaha siya sa pagtan-aw niini nga dili magkagot ang mga ngipon.

Kaniadtong Biyernes sa gabii, usa ka PUJ ang migawas sa iyang gisubay nga linya og didto na miagi sa agianan sa mga sakyanan nga iya unta nga ikasugat.

Gusto unta sa drayber sa maong sakyanan nga unhan ko niya og mokalit siya pagsulod sa linya nga akong gisubay.

Apan kay wala man g'yud ko mopahinay pagpadagan, napugos na lang siya paghunong kay mabangga man siya sa puthaw nga barandilya diha sa eskena Gorordo Avenue paingon sa Perpetual Succour Hospital.

Nasayud ko nga adunay lagda nga angay ka nga mohatag og higayon sa mga sakyanan nga mo-overtake apan adto ra kini sa wala’y double solid lines taliwala sa karsada.

Ang lain pa nga abuso nga makapasuko g'yud nako mao kining mga sakyanan nga gipangtakpan og itum nga plastic o bildo ang ilang plate numbers aron dili na makita.

Daku kining binuang kay kun ang maong mga sakyanan maka-aksidente ug mopasirit ra pagpadagan ang nakadam-ag dili gayud kita makaila kun si kinsa ang atong angay'ng patubagon.

Gibalik-balik na nako kini sa makadaghan nga higayon nga pulpol kaayo ang atong mga traffic enforcers nga sakop sa City Traffic Operations Management nga wala modakop niining maong mga sakyanan.

Mora lang sila og mga buta nga wala makakita sa mao nga mga kasaypanan ug abuso sa nahisgutan nga mga drayber. Utokan ang gitudlo nga chairman sa CITOM Board nga si Ruben Almendras, abogado ang executive director nga si Rafael Christopher Yap ug ligdong ang operations officer nga si Joy Tumulak.

Apan nahibulong ko nga wala’y bisan usa kanila nga nakamandar sa mga traffic enforcers nga pangdakpon kining mga abusado nga drayber, bisan kinsa pa sila.

Nasayud ko nga dunay ubang polis nga nanag-iya niining mga sakyanan nga gitaptapan og itum ang ilang plaka, apan dili kamo angay nga mahadlok kun igo lang kamo nga nagpatuman sa balaud.

Kaniadto dihang deputized pa ako sa LTO daghang mga polis ang akong gipangsakmitan og lisensya tungod sa paglapas sa balaud. Wala ko malisang kay igo lang ako nga nagpatuman sa balaud.

Diha pa gani'y higayon nga ang akong gidakup nga nagbutang og Vanity Plate nga "PNP 111" sa atubangan sa sakyanan ug gitangtang ang orihinal nga plate numbers mipakita kanako sa iyang 45 kalibre nga pistola.

Bisan gamay nga kahadlok wala g'yud ko mobati og gisakmit g'yud nako ang iyang lisensya. Pagtunol nako sa TOP ngadto sa mao nga tawo, gipikpik niya ang akong abaga og miingon nga midayeg siya sa lig-on nga baruganan nga akong gipakita.

Dili kini usa ka pagpanghambog ang pagtug-an ko sa akong kasinatian, kon dili pagdasig kini sa mga traffic enforcers nga ipatuman ang balaud sa walay kukahadlok.

Matud pa bitaw kaniadto ni kanhi PNP chief Panfilo Lacson "The police under my command will strictly enforce laws without fear and favor."

Maayo unta og kamong mga hingtungdan makabasa niining akong lindog mobati na kamo og kaisog sa pagpatuman sa balaod nga dili usab maghinambugero.

Sulod sa kapin sa upat ka tuig nako nga nahimong deputized agent sa LTO, ipasigarbo nako nga buotan ko apan estrikto nga mopatuman sa balaud. Siguro, sinati g'yud kadtong mga drayber nga akong gipangdakop.

Palihug sir Almendras, sir Raffy ug sir Joy, mandoi na ang inyong mga CITOM enforcers nga dili na magkyogpos sa ilang mga bukton diha sa karsada, samtang ang uban manighawak apan gitan-aw ra ang mga malapason sa balaud.

Kadtong mga traffic enforcers nga dili manakop, mas maayo tingali nga papahuwayon na lang kay gausik-usik lang ta sa pagsweldo kanila nga wala’y kapuslanan.