Ganti sa patugatuga

Dayong tapos sa 2013 napahinumdoman ko nga di gyod diay maayong mamintaha. Sa way paghatag og bisan unsang kahulogan gawas sa lunlon nga kalingawan gibasa nako sa Arangkada sa DYAB Abante Pa, Bisaya! ang mga kapalaran sa mga nangatawo ubos sa 12 ka hayop sa Chinese calendar: Ilaga, baka, tigre, kuneho, dragon, bitin, kabayo, karnero, unggoy, manok, iro ug baboy.

Nananghid kong daan nga sa way dapigdapig unahong simbolo sa tuig nga akong natawhan, ang dragon. Pagsugod pa lang nako og basa klarong apiki ang mga dragon sa 2014. May mga tigpaminaw dayong ni-text nga maayo pang wa ko mamintaha ug gipa-uwahi lang ang dragon.

***

Kadugayan nako og basa sa labing unang website nga naablihan akong nasabtan nga ang hubad sa nagsuwat kinsay suwerte ug kinsay demalas sa tuig sa berdeng kahoy nga kabayo gipasikad ra sa iyang tan-aw sa relasyon tali sa kabayo ug sa hayop nga nagrepresentar sa imong tuig nga natawhan.

Maong demalas ang dragon kay higpit nga karibal sa liderato sa kabayo. Suwerte ang tigre, bitin, manok ug kuneho kay sikit sila sa kabayo. Tanang kontra sa kabayo way ayo ang trabaho, kuwarta, gugma ug kahimsog. Tanang suod sa kabayo ma-promote sa trabaho, modato, makauyab ug maminyo ug mohimsog pag-ayo.

***

Sa wa pa ko hingpit nga maluya nabasahan nako sa ubang websites nga suwerte ang dragon sa 2014. Samtang ang ubang nagpatuong mga eksperto niingon nga ang bag-ong tuig haom alang sa pagminyo ilang mga karibal nipasidaan nga di maayong magsugod og bag-ong relasyon ni magpakasal, mas luwas ang pagpaundayon sa unsay nasugdan sa 2013.

Kon ganahan gihapon kang magtuo-tuo ug di ganahan nga mahugno nang daan sa wa pa ganing kasugod ang bag-ong tuig, palihug pangita og websites nga bida ang hayop sa tuig nga imong natawhan. Dako kaayo og ikatabang ang Google pagtultol sa kasayuran nga ganahan nimong mabasahan.

***

Kon wa pa ka maalarma sa nagkasungi nga mga pangagpas sa mga eksperto sa mga panghitabo sa tuig sa kabayo, gikasubo nako ang pagpahibawo nimo nga managlahi sab ang ilang gitakda nga petsa sa pagsugod sa Chinese New Year. Samtang may mga eksperto nga niingon nga magsugod ni karong Enero 31 ang ubang mga eksperto niinsistir nga unya ni magsugod sa Pebrero 4.

Diha na kong kaamgo sa dakong kalibog nga akong naablihan dihang ubang tigpaminaw nanukmat nga wa nako mabasahi unsay ilang dangatan sunod tuig. Gipasaligan nako sila nga gitiwas nako pagbasa ang mga pangagpas alang sa tanang 12 ka hayop. Nisumbalik sila nga wa mobuwag sa radyo og nahuman na lang ang akong programa wa gyod silang kabati nga nahisgutan bisan kausa na lang unsay kapalaran sa mga Capricorn.

***

Email: [email protected]