Mora'g pangwarta ni

Dili na kuno magpabayad ang dakbayan sa Sugbo niadtong motambong sa Environmental Sustainability Action Plan. Kana, dili kay tugotan ang usa ka Non-Government Organization aron lang maoy makapangwarta.

Sakpan g'yud lagi dayon ang dakung tinonto. Kamong mga opisyal sa City Hall pagbantay mo tawon uy aron walay magduda nga nakaapil mo sa pagpangawarta. Conflict of Interest sa usa ka sakop sa Solid Waste Management Board nga maoy mohimo'g seminar alang sa ESAP unya magpabayad nga adto sa iyang NGO mapunta.

Aw, kon mangutana ka sa mga opisyal sa City Hall natural man g'yud nga dili sila mahutdan og tubag, makiglantugi pa aron ipalutaw nga wala sila'y sayop nga nahimo.

Daghan kaayo nga pangwarta diha sa City Hall nga akong nabantayan. Sagdi lang, mabulgar ra kini sa umaabot nga mga adlaw karon nga gi-assign na ko nga investigative reporter sa The FREEMAN.

* * *

Ang mga imbistigador sa kapolisan angay'ng "updated" unta kanunay sa labing ulahi nga kalamboan nga naglambigit ang ilang trabaho.

Usa ka imbistigador sa kapolisan nanubag sa pangutana sa reporter human nila madakpi ang tawo nga nagdala og armas nga walay lisensya, ug sa samang higayon nakalapas sa gun ban nga gimando sa Commission on Elections.

Gipangutana ang imbistigador kon unsa nga kaso ang ilang ipasaka batok sa dinakpan, dili tukma ang iyang tubag. Klaro kaayo nga wala siya masayud nga ang Republic Act 8294 gihimoan na og kausaban pinaagi sa Republic Act 10591.

Una, ang karaan nga Firearms Law --Presidential Decree 1866-- giusab sa Republic Act 8294 atul sa administrasyon ni Presidente Ramos.

Gibutang sa maong balaud nga kadtong madakpan nga maghupot og armas nga walay lisensya mahimong konbiktohon sa illegal possession of firearms, apan kana kon wala siya'y laing salaud nga nahimo atul sa iyang pagkasikop.

Klaro kaayo nga kon ang tawo madakpan sama karon nga gipatuman ang gun ban, duha ka salaud ang iyang nahimo. Klaro kaayo nga kadtong Republic Act 8294 gituyo ra g'yud aron pagpabor sa madakpan.

Gituyo kadto aron nga makagawas pagdali sa prisohan si Robin Padilla nga nabilanggo pagdala ug armas kay mokunhod man ang tuig alang sa iyang pagkabilanggo.

Karon, giusab na sa Republic Act 10591 ang kontrobersyal nga lagda sa Section 1, sa Republic Act 8294. Giwagtang na ang lagda nga "A person may be convicted of illegal possession of firearms, provided there is no other crime committed."

Siyaro na man 'sab, kamong mga imbistigador sa kapolisan wala kamo masayud nga gibag-o na ang Firearms Law?

* * *

Ang pagpagawas sa bag-ong plate numbers sa sakyanan makapalisud pagtimaan sa mga tawo kon ang sakyanan makasugat og aksidente unya mosibat.

Pagka karon ang plaka sa mga sakyanan, tulo ka litra ug tulo 'sab ka numero, apan sa bag-o nga plate numbers nga hapit na kuno ipagawas himoon na nga tulo ka litra ug upat ka numero.

Unya ang plate numbers sa mga motorsiklo, himoon na usab nga duha ka litra ug lima ka numero. Kon mosibat ang sakyanan dili kini madali sa pagtimaan sa mga makakita.

Sa laktud, lain kini nga pangwarta sa mga opisyal sa kagamhanan kay magpasabot man kini nga lain na usab nga bayranan sa mga tag-iya og sakyanan.

* * *

Nakadawat ko og report sa padayong pagpanghakut og balas ug graba didto sa sapa sa Sitio Anislag, Barangay Canlumampao, Toledo. Ang kapitan kuno sa maong dapit wala makasanta sa illegal nga kalihukan. Dili ka makalikay sa pagduda Cap nga nakabinipisyo ka gikan sa tigpangubkob og bas kay wala man nimo aksyoni.

* * *

Illegal nga sugal nag-operate sa balay sa usa ka lay man ug katekista diha sa Barangay Manguio, Asturias. Walay gihimo ang kapitan ani? Sa Cordova kinsa man kini nga "Jack" nga sigi og pangayo sa mga magpasiugda sa sugal mao nga wala masumpo? Pagkadakung binuang.

* * *

Mga dispatchers sa dakung department store sa Barangay Apas gireklamo kay kakonsabo kuno's mga mangungoot sa maong dapit ug daghan na ang nakuotan. Na hala, palihug mga polis aksyoni ninyo ni dayon.