Gihilasan kong naminaw ni Kongresista Lito Atienza nga nireklamo atol sa iyang pagduaw sa Sugbo niadtong Lunes nga langay kaayo ang imbestigasyon sa mga eskandalo sa pork barrel. Samtang mahimo unta nga mas paspasan ang imbestigasyon sa mga pasangil batok nilang Janet Lim-Napoles ug mga senador ug mga kongresista apan wa gyoy makapangugat nga may maniobra sa paglangay-langay.
Nanlipaghong sa kauwaw si Atienza kay sa samang adlaw nga namasangil siyang giyak-an sa Malakanyang ang eskandalo natay-og ang tibuok nasud kay gituman ni Justice Secretary Leila De Lima ang saad nga ipasaka nang mga kasong plunder ug pagpangawkaw batok nilang Napoles ug sa labing gamhanang mga sakop sa Kongreso.
***
Inay manulisok angayng mangandam si Atienza. Kay kasagaran sa mga eskandalo sa pork barrel nahitabo samtang kabahin pa siya sa nangalisbo nga pamunoan ni kanhi presidente Gloria Arroyo. Gani may kahigayonan nga apil siya sa dugang mga opisyal nga maapiki sa pagtumaw sa dugang pang mga transaksiyon ug mga dokumento.
Pananglitan usa sa mga report sa Commission on Audit naghisgot nga minilyon ka pesos nga pork barrel natugpa sa peke nga non-government organizations pinaagi sa Department of Environment and Natural Resources. Sa higayon nga si Atienza ang gipahimutang ni Arroyo nga kalihim sa DENR.
***
Si Atienza ang tagduma sa DENR dihang nigawas si Jun Lozada isip whistleblower sa P329-bilyones nga NBN-ZTE broadband scandal. Si Lozada maoy tagduma sa Philippine Forest Corporation apan gikuha sa Malakanyang nga eksperto ug busa maoy labing nasuhito sa NBN-ZTE.
Gani si Atienza gipasanginlan ni Lozada nga usa sa mga dagkong mga opisyal sa gobyerno nga kabahin sa maniobra pagpahilom niya aron unta magpabilin nga tinagoan ang transaksiyon. Wa magtagad si Arroyo pag-imbestigar sa exposé ni Lozada. Apan wa gyoy tingog si Atienza bisan ek na lang pagreklamo sa kalangay sa pagsusi sa pagsuway pagwaldas sa dakong buhis sa katawhan.
***
Mahimong gimingaw lang si Atienza sa iyang amo nga si Arroyo. Kay kon si Arroyo pay nagtungkawo sa Malakanyang pagtumaw ning exposé sa P10-bilyones nga pork barrel scandal hagbay ra unta nahilom ug nahipos ang whistleblowers, nahanaw ang mga dokumento ug ubang mga ebidensiya ug naghudyaka unta nga nagpadayon pagpahimus sa ilang pork barrel ang mga senador ug mga kongresista.
Inay mauwaw nagpabantang si Atienza pagkabayo sa kampanya pagpapas sa pork barrel. Pinahimuslan ang iyang kasuod sa pipila ka haligi sa Simbahang Katoliko labihan niyang nakapanaway ni Presidente Noynoy Aquino kansang bugtong atraso mao ang pagsukwahi sa kabilin ni Arroyo pagtabon sa mga eskandalo. Kon wa pang kabantay ang mga obispo mga kaalyado nga sama ni Atienza maoy hinungdan nga nagmingaw ang mga protesta nga ilang gipasiugdahan.
***
Email: leo_lastimosa@abs-cbn.com.