Nganong tak-om si Cuenco

Ambot may ideya na ba si Cebu City Councilor James Cuenco nga pila ka adlaw human niya awhaga ang iyang kaubang mga opisyal sa gobyerno sa pagsumiter sa ilang kaugalingon sa independente nga lifestyle check tungod sa pag-ulbo sa P10 bilyones nga pork barrel scam nga giingong gipasiugdahan ni Janet Lim-Napoles siya mismo kinahanglan nga manubag og mga pangutana sa laing eskandalo sa pork barrel nga naglambigit niya ug sa ubang mga sakop sa iyang pamilya.

Sa iyang kredito maisugon si James nga nanubag sa mga panguta sa anomaliya sa pork barrel sa iyang amahan, si kanhi kongresista Antonio Cuenco. Apan iyang mga tubag nakapatumaw sa dugang mga pangutana.

Gitumbok ni James si Sisinio Villacin Jr. sa Dell Pharmacy, nga iyang nahibaw-an nga nakasibat na paingon sa Estados Unidos, nga maoy tinuod nga utok sa anomaliya. Apan wa siyang kapasabot nganong wa silay kaso nga napasaka batok ni Villacin hangtod karon. Di ni normal nga postura kon tinuod silang mga biktima sa mga palusot ni Villacin siyam ka tuig nang nilabay.

Nipasalig si James dihang nahinabi sa TV Patrol Central Visayas nga ilang susihon may kabtangan pa ba si Villacin sa Sugbo nga mahimong masakmit bugti sa P3.39 milyones nga pork barrel. Apan wa kapasabot si Cuenco nganong ilang gitugotan ang Dell Pharmacy nga padayong mo-suplay og tambal sa Cebu City Hall hangtod karon.

Giangkon ni James ang gibisto ni Louis James Yrastorza, kawani sa TNT Health Program, ngadto sa Commission on Audit (COA) nga mahimong makadaot niya: Pulos pirmado ni James ang referral letters nga gipakita ni Villacin ngadto sa cashier sa Vicente Sotto Memorial Medical Center (VSMMC) aron makakolekta gikan sa pork barrel.

Nalutsan ba lang si James tungod sa ilang kasuod ni Villacin? Nagtinapolan ba lang pagpirma sa blangko nga referral letters nga nakahatag ni Villacin og hingpit nga kagawasan pagsuwat sa bisan unsang ngan nga iyang mahunahunaan? O nakigkonsabo gyod ni Villacin pag-imbento sa pekeng mga pasyente?

Samtang dalayegon ang kaisog ni James pagpanubag sa mga pangutana, salawayon ang pagtago sa iyang amahan sa iyang responsibilidad pagpasabot nganong iyang gitugotan nga mawaldas ang buhis nga gipatud-an og singot ug dugo sa Sugbuanong mga magbubuhis. Di makiangayon nga motak-om lang si Cuenco tungod lang sa technicality nga wa siya maapil sa mga sinumbong sa kaso.

Apil si Cuenco sa listahan sa mga sad-an sa orihinal nga imbestigasyon sa COA. Apan gipapas ang iyang ngan sa ulohang buhatan sa COA. Di malalis nga kamatuoran mao nga iyang pork barrel ang gikawat. Labing gamay niyang mahimo samtang gisusi pa nakaapil ba og pangawat mao ang pagpangayo og pasaylo sa mga Sugbuanon sa iyang pagpabaya.

***

Email: [email protected]