Ihawan sa dakbayan pasirad-an

Kuyawa kon mapungot ang kadagkoan sa Department of Environment and Natural Resources (DENR) ug sirad-an gayud nila ang ihawan sa dakbayan sa Sugbo diha sa North Reclamation Area.

Paminaw nimo unsa kaha'y epekto niini kon mahitabo? Gitug-an ni Dr. Pilar Romero, ang acting head sa Department of Veterinary Medicine and Fisheries (DVMF) nga ubos sa iyang pagdumala ang ihawan sa dakbayan nga may closure order na sila nga nadawat gikan sa DENR.

Sige lang tawon sila og hangyo-hangyo ngadto sa mga opisyal sa DENR nga dili lang usa ipatuman ang pagsirado sa ihawan sa dakbayan.

Ang kamandoan sa DENR nagumikan kay ang ihawan sa dakbayan nga kaniadto naila nga Cebu City Modern Abattoir wala motuman sa balaod sukad pa sa iyang pagkahimo pipila ka dekada na ang milabay.

Ang sayop nga nahimo niini mao nga ang iyang mga “waste” kon hugaw gikan sa ihawan gideritso ra man og paagas ngadto sa sapa nga anaa ra usab mahimutang kilid sa ihawan.

Giangkon ni Dr. Romero nga usa kini ka dakong kalapasan sa environmental laws ug igo lang nagtuman ang DENR sa ilang kaakohan.

Pastilan, dili baya unta kini dako kaayo nga problema tingali kay dili halayo sa mao nga ihawan, anaa ang usa ka water treatment facility nga ang SM City ra kaniadto maoy migamit. Ambot og padayon pa kaha usab kini nga gigamit karon.

Akong gipahibalo niini si Mayor Michael Rama human sa press briefing namo ni Dr. Romero kagahapon ug nalipay si Mayor Rama nga nasayud siya niini.

Matud ni Rama nga karon lang siya masayud niini mao nga iya dayon kini nga ipalihok sa mga hingtungdan aron maasikaso ug matubag ang panginahanglan.

Alang ni Mayor Rama dili man dako nga problema kay duna may waste water treatment facility nga anaa ra duol sa  ihawan.

Kon mahitabo nga dili na magpahangyo ang DENR ug sirad-an gayud nila ang atong ihawan sa dakbayan, matubag man tingali gihapon ang panginahanglan sa mga negosyante og karne apan hasol na kanila kay adto na man sila magpunsisok sa ubang ihawan.

Matag adlaw kapin sa 200 ka baboy ang maihaw diha sa ihawan sa dakbayan. Gawas niini makaihaw usab sila og 65 ka “large animal” kanang baka, kabaw ug kabayo, unya daghang kanding.

Kinahanglang tagdon dayon kini sa atong mga opisyal sa dakbayan sa Sugbo mentras wala pa kaayo masuko ang DENR kay law-ay usab kaayo nga ang dakbayan sa Sugbo nga first class city, unya malapason sa balaod?

* * *

Nalipay kaayo ang mga tinun-an nga mga scholars sa dakbayan kay gipasalig kagahapon ni Mayor Rama nga tagdon niya nganong dugay man nga mahatag ang school supply allowance sa mga city scholars.

Gidala nako kining mao nga isyu ngadto sa mayor kay nasayud ko sa yangungo sa mga scholars sanglit duha kanila ang akong anak. Ambot unsa kaha'y hinungdan kay P300 milyones man ang budget nga gipagahin ni Mayor Rama niini unya giaprobahan gayud sa konseho para school-year 2012-2013.

Kaniadtong school-year 2011-2012 wala pa gani 'sab nila madawat. Bati man 'sab gud nga kusog kaayo mopasalig ang atong mga opisyal unya dili nila tumanon, total anaa ma'y budget para niini.

Buyno kamong mga scholars sa dakbayan ayaw kaayo mo kabalaka kay sigurado ko nga tagdon na kini sa atong mga higala diha sa City Scholarship Committee.