Kon makabalik si Gwen

Kon makabalik og lingkod sa Kapitolyo si suspended Governor Gwen Garcia karong Hunyo 19 aron pagtiwas sa nahibiling 11 ka adlaw sa iyang ikatulo ug kataposang termino, mahimo niyang papason ang tanang kausaban nga napatuman ni Acting Governor Agnes Magpale sa niaging unom ka buwan.

Pagdason sa nasugdan na niyang pagsupak sa lehitimong kamandoan sa nasudnong gobyerno, mahimo gani niyang gamiton sa makausa pa ang iyang buhatan aron sa pagtuman sa tanan niyang gusto ug pagpatuyang sa iyang gibati uban ang pangangkon nga siyay tinuod nga gobernadora sa Sugbo ug pakamatyan niyang pagpanalipod sa mandato nga gihatag sa mga Sugbuanon niya di lang kausa, di lang kaduha kon dili katulo ka higayon.

***

Ang 11 ka adlaw niyang pagtungkawo sa Kapitolyo igo nang lugway aron paghimo sa mosunod:

• Padayunon niya pagtabon og anapog ang tibuok Balili properta sa Tinaan, Naga City aron mapapas ang kinakusganong ebidensiya sa mga kasong kriminal batok niya sa Sandiganbayan nga nanukad sa pasangil nga mas daghang dagat kay sa yuta ang iyang gibayran og P98.9 milyones sa buhis sa mga Sugbuanon; ug

• Buhian niyang gipugngan ni Magpale nga P55 milyones nga pork barrel sa iyang amahan nga si Kongresista Pabling Garcia sa ikaduhang distrito ngadto sa iyang manghod nga si Mayor Nelson Garcia sa Dumanjug.

***

Way arang niya. Mahimong bakwion ni Garcia ang kamandoan nga tabonan ang iyang nawong sa usa ka milyon ka notebooks nga gilangay ni Magpale pag-apud-apod ngadto sa mga tinun-an. Mahimo ganing iyang ipabalik ang iyang dagway sa 2,600 ka medalya nga balor og kapin sa tunga ka milyon ka pesos nga gipasapawan ni Magpale sa nawong ni Lapulapu, sa bayhon sa Kapitolyo ug Magellan's Cross ug sa mapa sa Sugbo.

Puslan mang adto na lang siya magtikaw-tikaw sa ikatulong distrito sa mosunod nga tulo ka tuig, mahimong lukpon ang tibuok Sugbo sa iyang ngan ug mga hulagway. Iyawat na lang di siya makalimtan sa mga botante sa sunod nga piniliay sa 2016.

***

Apan sa di pa mahinayak sa pag-umol sa iyang mga plano, angayng pahinumdoman si Garcia nga human isalikway sa mga botante ang mayoriya sa ilang pamilya sa niaging piniliay di na siya sama kahawod ug, labaw sa tanan, ang mga Sugbuanon mahimong di na sama kamapasayluon:

• Nibalitok nang mayoriya sa iyang mga alyado sa Cebu Provincial Board;

• Nibalitok nang mayoriya sa iyang alyadong mga mayor nga wa mangapilde sa niaging piniliay; ug

• Human sa pagkataral sa korte ug pagkataktak sa katungdanan ni kanhi provincial treasurer Roy Salubre ug uban niyang batabata tungod sa Balili property, mahimong wa nay department head sa Kapitolyo nga moyanguyango dayong duko ug paawot sa bisan unsa niya sugo.

***

Email: [email protected]