Pasalamat sa Kapamilya Run

CICC, Mandaue City—Pagbasa nimo ini, may upat na ka buto nga nabati sa dakong hawan dinhi sa Cebu International Convention center (CICC). Silang Mandaue City Mayor Jonas Cortes, Mandaue City Vice Mayor Glenn Bercede, Cebu City Mayor Mike Rama ug ABS-CBN Cebu Station Manager ug Visayas Cluster Head Tata Cinco-Sy ang responsable.

Nagpulipuli sila pagpabuto sa starting gun sa buwag ug sunud-sunod nga mga kategoriya sa Kapamilya Run: Si Cortes ang nisugod sa 25 ka kilometro nga lumba sa alas-4:30 sa kadlawon; si Bercede ang nisugod sa 15 ka kilometro nga lumba sa alas-4:45 sa kadlawon; si Rama ang nisugod sa pito ka kilometro nga lumba sa alas-5 sa kadlawon; ug si Ma'am Tata ang nisugod sa tulo ka kilometro nga fun run sa alas-5:15 sa kadlawon.

***

Kaliboan ka runners ang madasigon nga nitubag sa starting guns. Sa labing unang higayon sa dul-an sa duha na ka dekada nga Kapamilya Run, nagsugod ug natapos ang tinuig nga lumba sa dagan ning istruktura nga napuno sa daghan uyamot nga kontrobersiya.

Salamat nilang Acting Cebu Governor Agnes Magpale ug Provincial Tourism Officer Grace Paulino ug salamat sab ni Gin Claridad ug sa kadagkoan sa Philippine Exhibits and Themeparks Corp. (Petco) sa ilang pagpaggamit sa dakong hawan ug sa pagpahuwam sa tanang kahimanan sa CICC nga way bisan unsang kontrobersiya.

***

Salamat sab nilang Mayor Cortes, Bise Mayor Bercede, Administrator James Abadia, Executive Secretary Jamaal James Calipayan, Public Information Officer Roger Paller, Traffic Head Edwin Ermac ug ubang mga tagduma sa Dakbayan sa Mandaue sa ilang pagpagamit sa labing dagkong kadalanan alang sa lumba, pagpakatap sa traffic enforcers ug pagpahuwam sa mga tolda ug portalets.

Gipaningkamotan namo nga kamenosan ang kahasol ngadto sa mga motorista pinaagi sa pagtuman sa lagda sa Traffic Enforcement Agency in Mandaue (Team) nga carousel ang ruta sa lumba aron nga kausa ra maagian ang kadalanan ug mas daling kaablihan ngadto sa mga motorista.

***

Daghang salamat sa mga boluntaryo sa Association of Concerned Texters (ACT) nga nitabang pag-apud-apod sa mga pagkaon ngadto sa runners ug nilang Jun Entica ug kaubanan sa Care sa ilang pagsilbing communicators sa kinatibuk-ang ruta.

Daghang salamat sab sa Emergency Rescue Unit Foundation (Eruf) nga gipangulohan ni Dr. Pek Eng Lim, Action Emergency and Rescue Team (Acert) sa Mandaue ug Basak Pardo Emergency Response nga gipangulohan ni Cebu City Councilor-elect Dave Tumulak sa ilang pagpakatap sa ilang mga ambulansiya.

Labaw sa tanan, ngadto sa tanang nagparehistro sa Kapamilya Run karong tuiga: Mangayo mi og pasaylo sa tanang kakuwangan namong mga tigpasiugda ug daghang salamat sa inyong tampo pagtigom og igong pundo pagtabang sa labing kabos nga mga eskuylahang publiko sa Sugbo.

***

Email: [email protected]