Way but-anay sa pangutana

Sa unang mga higayon nga nakigsabot ang US Embassy aron ma-interview ang embahador sa DYAB 1512, nahimangod ko. Kay gawas nga pahatagon ming daan sa mga pangutana, ipa-detalye pa gyud ang personal nga kasayuran sa magsisibya nga mohimo sa interview. Mora hinuon nga kami maoy nag-apas ug di sila maoy nanghangyo sa interview.

Hapit na gyud ko moprangka nila nga ang tarong nga interviewee di maoy magbuot unsay ipangutana sa interviewer ug di mosugo sa magsisibya pagsuwat sa iyang personal nga kasayuran. Mopahinumdom sab unta ko nila nga wa mi manghagad, nga silay ganahan nga magpa-interview. Apan nipatigbabaw ang diplomasiya sa mas mapailubon namong kaubanan.

***

Sa sunod nilang panghagad og interview, gipasa na nako sila. Gitambagan hinuon ang akong kaubanan nga samtang dakong pribilihiyo ang pakighinabi sa US ambassador di angayng ibugti ang kaligdong sa pagpanibya--nga di mi magpagamit ni bisan kinsa pagpalusot sa ilang mga linya sa propaganda ug nga ang magsisibya di ang embahada maoy magbuot sa mga pangutana.

Maong nakugang ko pagkadawat sa laing tawag gikan sa US Embassy pila ka semana ang nilabay. Wa pa diay sila motagam. Nalipay hinuon ko pagkahibawo nga wa na sila magkutikuti pagpakisayod kinsay magsisibya nga mangutana ug unsay mga pangutana. Igo na lang silang nagpahibawo unsang adlawa ug unsang orasa moabot si US Ambassador Harry Thomas sa among sibyaanan.

***

Dihang niabot ang mga kawani sa embahada nga nagpahibawo namong mosunod sa pila ka gutlo si Thomas, nagtudlanay pa mi kinsay makighinabi niya. Kay naatol nga naniudto mi sa inasal nga itik ni Klasmit Yul Julia para sa belated birthday party ni Edison Delos Angeles.

Nibalibad silang June Perez, JT Benz, Vilma Andales ug Rico Lucena. Dihang niabot ang daghang guwardiya ni Thomas, nabalaka ming magduda ang ilang dang mga iro sa baho sa itik ug dinugoan. Maayo na lang nga bisan sa nagsinaw namong simod gideklarar nilang luwas ang sibyaanan alang sa embahador.

***

Nangutana kong Thomas unsay gusto niyang hisgutan. Bisan unsa, nipasalig siya. Nihangyo lang nga hisgutang tigom sa US veterans sa Asya ug Pasipiko nga gihimo sa Sugbo.

Mas nigaan ang akong buot dihang nikumpisal si Thomas nga Heat siya batok Spurs sa NBA Finals tungod sa Pinoy Coach nga si Erik Spoelstra. Gikilaw niyang tanang pangutana--gikan sa pagdumili sa US paglaban sa Pilipinas batok sa China ug Taiwan ngadto sa pasangil nga, bisan ika-115 nang sumad sa Independence Day sa Pilipinas, gigawongan gihapon sa US ang ekonomiya. Gisulti ni Thomas ang tukma nga mga pung pagpanalipod sa iyang nasud. Nagbilin pa og maayong balita: Ang mga Pinoy nga ilegal nga nagpuyo sa US hangtod sa Disyembre 2011 tugotang magpabilin kon mapasar sa Kongreso ang Immigration Reform Bill ni Presidente Barack Obama.

***

Email: [email protected]