Tulubagon ni Mayor Soc

Naabtikan na sang Joavan Fernandez ang kapolisan. Daghang salamat sa pagpabaya sa polis, PO3 Leandro Azarcon, nga gipabantay sa iyang prisohan. Mahimong tungod kay way nakasulti niya sa kamaru ug kadangog sa piniriso. O apil sa mga polis sa Talisay nga nahatagan og pabor sa sinagop ni Talisay City Mayor Soc Fernandez.

O mahimong nailad lang gyod siya ni Joavan. O lumo lang gyod ang iyang kasingkasing. Mahimong natandog sa kagagmay ug kalinghod ug ka-inosente sa mga anak ug, bisan sa tanan niyang pagbansay-bansay sa mga lagda sa disiplina sa kapolisan, wa kaagwanta sa pangiliyupo ni Joavan nga pagawason bisan kadiyot lang aron makagakos sa mga bata.

***

Apan di kalumo sa kasingkasing ray problema ni Azarcon. Nakalapas na siyang daan sa mga lagda pagbantay sa mga piniriso sa wa pa niya pagawasa si Joavan sa selda:

"Una, gitugotan niyang makaduaw ang asawa ug mga anak ni Joavan bisan dayon nang tungang gabii niadtong Miyerkules sa gabii; ug

"Ikaduha, gitugotan niya si Joavan nga makagamit og cellphone sud sa selda, gani nikumpisal ngadto ni June Perez sa DYAB Radyo Patrol si Mayor Fernandez, nga nangangkon nga didto sa Surigao, nga nagkasulti silang Joavan, kinsa nipahibawo niya nga niduaw ang mga bata sa prisohan, pila ka gutlo sa wa pa mahitabo ang pagpuga.

***

Matod ni Koronel Elmer Lim, hepe sa kapolisan sa Talisay, nasuko siya pag-ayo pagkahibawo sa pagpuga ni Joavan. Girelibohan niyang polis nga napugahan ug gipa-imbestigar aron pagtino sa labing tukma nga silot nga ikapahamtang sa iyang kalapasan.

May sukaranan si Lim nga moulbo. Naabtan sila og usa ka buwan pagpangita sa wa pa nila masikop sud sa bay ni Mayor Fernandez sayo ning semanaha ug napasakaan na nila si Joavan og kaso nga di kapiyansahan. Sa kataposan, mahimo nang tanggungon si Joavan samtang husayon ang labing uwahi niyang mga kasong kriminal. Maibanan untang ilang labad sa ulo ug makatingob sa atensiyon sa umaabot nga piniliay ug ubang mas mahinungdanong mga hulga sa seguridad.

***

Nabalaka si Mayor Fernandez sa seguridad ni Joavan. Maong giawhag ang iyang sinagop pagsurender. Nagdumili si Fernandez nga masibya sa DYAB ang panagsulti nilang June. Maong gipasidan-an nako si June nga mangandam nang daan nga, samang Koronel Lim, mahimong pasanginlan sab siyang ni-misquote sa gisulti sa mayor.

Nipasangil si Mayor Fernandez nga nipuga si Joavan kay gibutangbutangan og armas ug granada. Para niya mga polis gihapoy sad-an sa pagpuga. Way kalainan sa panulisok sa iyang mga dumadapig nga media maoy nakapapabadlungon ni Joavan kay ilang gitawag nga "notorious." Ang angay’ng ipasabot sa mayor: Nganong gitugotan niya si Joavan pagtago sa iyang bay ug ang sakyanan sa gobyerno nga giingong gigamit ni Joavan pagpuga?

***

Email: [email protected]