Kahawod nilang Soc ug Joavan

Hinaot nga sa kataposan makaangkon na gyud og kaisog ang kapolisan pagkiha ni Talisay City Mayor Soc Fernandez. Tungod sa pasangil nga iyang gisabotahe ang mga imbestigasyon sa mga kaso sa iyang sinagop nga si Joavan Fernandez. Ang pagdupa ni Soc gituohan nga maoy hinungdan nga wa mabaraw ang pabadlong ni Joavan.

Gawas sa giingong pagtago ni Joavan sa bay ni Soc sa Bulacao dihang nasakpan sa kapolisan niadtong Lunes sa gabii, angayng manghipos na ang kapolisan og dugang mga ebidensiya sa pagduda nga aktibong gitagoan ni Soc sa Joavan sa daghan na uyamot nga mga higayon sa iyang pagtagutago gikan sa balaod.

***

Posibleng mga ebidensiya batok ni Soc: Pila na sa nangangkon nga mga biktima ni Joavan ang nagtrabaho karon sa Talisay City Hall? May kuwarta ba sa gobyerno nga naggasto aron pagpahilom sa mga biktima ug pag-areglo sa mga kaso nga ilang gipasaka batok ni Joavan?

Nganong wa pa may kaso nga napasaka batok ni Soc sa iyang pagtugyan sa sakyanan sa gobyerno ngadto ni Joavan nga di kawani sa City Hall? Hinaot nga ubos sa bag-ong liderato sa Talisay City Police Office bulingan na sa kapolisan ang kaputi sa ilang kiting ug suklan nang mayor nga gipasanginlang nagpakauwaw nila sud na sa daghang katuigan.

***

Timaan sa pagtidlom sa gahom ug influencia ni Soc ang kaisog sa kapolisan nga nisud sa iyang bay aron pagsikop ni Joavan. Kon wa pa mangisog silang Kongresista Eddie Gullas ug ubang haligi sa parting Alayon, nagsige pa unta og paantaw ang kapolisan hangtod karon sa gituohang mga tagoanan ni Joavan.

Bisan modaog pa si Soc sa eleksiyon sunod semana, inihap na lang ang mga adlaw sa iyang kahawod. Kasarangan na lang siyang konsehal liwas sa udtong tutok sa Hunyo 30. Nga di nang kahaylo ni kahudlat sa kapolisan. Busa kon may tarung pang kabuot si Joavan, angay siyang manguros nang daan.

***

Angayng pasidunggan si Talisay Police Chief Elmer Lim sa iyang pagmatuod nga di siya sama sa iyang gisundan nga inutil batok ni Joavan. Ang kanhi hepe gipasanginlan nga didto kapusta ni Joavan human nangayo og plite gikan sa sinagop sa mayor alang sa usa sa ilang operasyon sa Mindanao.

Nikumpisal si Lim nga di sayon ang pagsikop ni Joavan. Kinsa kadaghan na nila nakit-i ug nagukod. Apan naglisod pag-apas kay pataka si Joavan lang og lusot sa trapiko. Ginamit ang nagkalainlaing sakyanan. Gikan ug padung sa nagkalainlaing tagoanan. Masaligon si Lim nga di kapiyansa alang sa iyang temporaryong kagawasan si Joavan tungod sa pagpasaka sa kasong ilegal nga paghupot og armas ug eksplosibo batok niya.

***

Email: [email protected]