Wage boards angayng papason

Ning nahibiling mga adlaw sa kampanya sa di pang piniliay karong Mayo 13, usa sa angayng tutokan sa mga anak sa singot, may unyon man o wa, mao ang pagpaningil og saad gikan sa mga magpapili pagka senador ug pagka kongresista nga ilang papason ang wage boards kon makalingkod o kasublian na sa katungdanan.

Kay ang wage boards maoy gihimong kahimanan sa mga sakop sa Kongreso paglikay sa ilang responsibilidad pagtakda sa minimum nga suholan ug sa mga negosyante pagluok sa suholan sa mga mamumuo ngadto sa labing ubos nga ang-ang sa niaging duha ug tunga na ka dekada.

***

Natukod ang wage boards pinaagi sa Republic Act 6727 nga gipirmahan ni anhing Presidente Cory Aquino niadtong Hunyo 9, 1989 human nagkauyon ang duha ka bay balaoranan nga gipangulohan nilang kanhi Senate President Jovito Salonga ug anhing House Speaker Ramon Mitra.

Hingpit nga gitahan sa mga senador ug mga kongresista ngadto sa mga sakop sa wage boards ang ilang gahom sa pagsubli ug pagtakda sa suholan sa mga mamumuo. Ug karong sibaw nang tiyabaw sa labor sa kaubos sa suholan, daghang salamat sa wage boards, ang mga magbabalaod morang mga Pilato nga nanghunaw og responsibilidad sa bangis nga krimen nga ilang gipasiugdahan.

***

Wa pa gani kapahigayon sa ilang labing unang tigom ang wage boards 24 ka tuig ang nilabay, gipiangan nang daan ang labor sector. Kay ang komposisyon sa wage boards klarong giumol aron paghatag sa mayoriya ngadto sa management sector sa tanang higayon.

Kay samtang kadudahan pang tsirman sa wage board, ang regional director sa Department of Labor and Employment (DOLE), kon modapig ba sa labor, di mahitabong mobudhi sa ilang suod nga mga negosyante ang laing mga sakop sa board, ang regional directors sa Department of Trade and Industry (DTI) ug National Economic and Development Authority (NEDA).

***

Mas dako ang dag-anan sa labor kon ibalik ang gahom pagtakda sa suholan ngadto sa Kongreso. Kay ang mga senador ug mga kongresista kinahanglang mokuha og mandato gikan sa mga botante. Busa wa silay laing kapilian gawas sa pagpatigbabaw sa mas makiangayon sa nasudnong produksiyon ngadto sa mga mamumuo.

Mga negosyante mo-influencia sab sa mga sakop sa Kongreso. Ang kalainan mao nga ang mga sakop sa wage board di pinili sa katawhan ug busa makapatuyang sa ilang gibati. Kay pulos rekomendado sa ilang mga sektor ug tinudlo sa presidente, lahi sa mga sakop sa Kongreso nga mahimong maaghat sa katawhan pagpalapad sa ilang panglantaw, ang mga sakop sa wage board morang mga kabayo sa Sanciangko nga ang hiktin nga interes ra sa ilang hut-ong maoy makit-an.

***

Email: [email protected]